समाजवादी मोर्चाय् बाबुराम छाय् मन्ह्यन ?
येँ (नेपालभाषा टाइम्स)÷प्यंगू समाजवादी पार्टी जानाः म्हीग समाज–वादी मोर्चा घोषणा जुल । तर उकी थ्व मोर्चाया छम्ह विचारक डा. बाबुराम भट्टराई धाःसा सहभागी जुयामदी । वय्कः छाय् थुकी सहभागी जुयामदिल धकाः थीथी न्ह्यसः पिहां वःगु दु ।
मोर्चाय् आवद्ध छम्ह नेतां कनादी कथं डा. भट्टराईं आः थः वामपन्थी मखुत, मध्यपन्थी जक खः धयादीगु कारणं वय्कःयात मोर्चाय् हये मफुगु खः । मोर्चां माक्र्सवाद अझ नं आदर्श सिद्धान्त माने यानाच्वंगु दु । तर डा. भट्टराईं माक्र्सवाद आः सान्दर्भिक मजुइधुंकल धयादीगु जुयाः वय्कः मन्ह्यंगु खँ नं धाःगु दु ।
थ्वहे झ्वलय् नेपाल समाजवादी पार्टीया अध्यक्ष डा. भट्टराईं थ्व समाजवादी मोर्चा दुने व पिने शक्ति बार्गेनिङ यायेगु हतियार मजुइमा धकाः टिप्पणी यानादीगु दु । वय्कलं सामाजिक सञ्जाल ट्वीटरपाखें छगू पोष्ट यासें उगु खँ धयादीगु खः ।
वंगु छुं न्हि न्ह्यः जक माओवादी केन्द्रया अध्यक्ष पुष्पकमल दाहाललिसे वय्कलं मोर्चा बारे खँल्हाबल्हा यानादीगु खः । डा. भट्टराईं ट्वीटरय् च्वयादीगु दु– छुं मनूतय्त न्ह्याबलें व अप्वःसित छुं ई ठगे याये फइ तर फुकसितं न्ह्याबलें ठगे याये फइमखु धइगु हेक्का तयेमाः ।’
भट्टराईं याःगु ट्वीटय् धयातःगु दु, ‘समाजवाद संसदीय अंकगणित मिले यानाः व जालझेल यानाः वइगु उपभोग्य वस्तु मखु । थ्व ला उदात्त वैचारिकीया निर्देशनय् उन्नत चेतना व उच्च नैतिक धरातल दुपिं मानवया ताःहाकःगु मंकाः कुतलं निर्माण जुइगु तसकं उन्नत सभ्यताया चरण खः ।’
वंगु सोमवाः माओवादी केन्द्र, जनता समाजवादी पार्टी, एकीकृत समाजवादी व नेत्रविक्रम चन्द पार्टी जानाः समाजवादी मोर्चा दयेकूगु खः । संविधान संशोधन, शान्ति प्रक्रिया व समाजवादया उद्देश्य हासिल यायेगु मोर्चाया रणनीतिक आज्जु खः धाःगु दु ।
LEAVE YOUR COMMENTS