अय््लाःया पलेसा गजि त्वनाः गाडी चले याइपिं

येँ – सरकारं मादक पदार्थ सेवन यानाः सवारी साधन चले याइपिंत कारवाही यानाच्वंगुलिं दुर्घटना म्हो जुयाच्वंगु दावी यानाच्वंगु दुसां तथ्यांकं धाःसा सवारी दुर्घटना म्हो जूगु क्यनाच्वंगु मदु ।ट्राफिकं अय्लाः त्वनाः गाडी चले याना वइपिनि चेकजाँच यानाच्वंसां चालकतय्सं धाःसा उकिया विकल्प कथं गजि त्वनाः गाडी चले यायेगु सुरु याना हःगु खँ सीदुगु दु ।

येँया थीथी रुटया लिसें स्वनिगलं पिहां वनीगु गाडी चालकतय्सं नं गजि त्वनाः गाडी चले याना वयाच्वंगु खँ छम्ह चालकं धाःगु दु । गजि त्वनाः गाडी चले याइपिंसं गाडी ब्वाकीबलय् थःपिं लिचिलाः च्वनेमाःगु खँ कँसें उम्ह चालकं थौंकन्हय् टिपर गाडीत अप्वः दुर्घटना जुयाच्वंगु कारण नं गजि त्वनाः चले याःगुलिं हे खः धाःगु दु ।

वय्कःया कथं ल्याय्म्हपिं ड्राइभरतय्सं अप्वः थें गजि त्वनाः हे गाडी चले यानाच्वंगु दु । उमिसं गाडी चले याइबलय् स्पीड नं अप्वः दइगुलिं गाडी नियन्त्रणय् कायेमफयाः दुर्घटना जुइगु खः । वय्कलं धयादी, ‘मिखा हे ह्याउँसे च्वंक गजि त्वनाः गाडी ब्वाके हइगु, ग्यानापुइसे हे च्वं ।’
सरकारं गथे मापसे चेक यानाच्वंगु दु अथेहे गजि त्वनाः गाडी चले याइपिंत नं चेक यायेगु खःसा दुर्घटना म्हो जुइगु बिचाः वय्कःया दु ।

येँय् दुने थीथी रुटय् चले जुइगु गाडीया चालकं नं गजि त्वनाः गाडी चले यायेगु यानाच्वंगु व उमिसं नं सतकय् लाःलाःथे गाडी ब्वाकीगु अनुभव वय्कःया दु । विशेष यानाः रिङरोड एरियाय् सञ्चालन जुइगु बसया चालकतय्सं गजि त्वनाः गाडी चले यायेगु यानाच्वंगु दु । अय्लाः त्वंगु जूसा उकिया बास नवयाः त्वनाः चले याःगु खः मखु सीदइगु खः तर गजि त्वना वइबलय् अथे बास वइ मखु ।

अले गजि त्वनातःगु नं काचाक्क सीके मफइगु जूगुलिं गाडी चालकत गजि त्वने पल्के थुयाच्वंगु खः । येँय् चले जुइगु ट्याक्सी चालकतय्सं नं गजि त्वनाः गाडी चले यायेगु यानाच्वंगु दु । तर प्रहरीं धाःसा मापसे यानातःपिंत गुलि अःपुक ज्वनेगु यानाच्वंगु दु गजि त्वनीपिंत उलि अःपुक ज्वने फयाच्वंगु मदु ।