ने. सं. ११४४ कौलाथ्व पारू - नःलास्वनेगु

सगरहवाय् विहार दयेकेत अन्तक्र्रिया

येँ(नेपालभाषा टाइम्स)- बुद्ध जन्मभूमि लुम्बिनी जःखःया लागा सगरहवाय् शाक्य संहार स्मृति विहार दयेकेत अन्तक्र्रिया ज्याझ्वः याःगु दु । द्वलंद्वः शाक्यतय्त नरसंहार याःगु धयातःगु बुद्ध जन्मभूमि लुम्बिनी जःखःया लागा सगरहवाय् लुमन्ति विहार दयेकेत उगु अन्तक्र्रिया याःगु खः ।

शाक्य महाविहार संघया ग्वसालय् संघया नायः शुभकाजी शाक्यया सभापतित्वय् जूगु ज्याझ्वलय्मूपाहां लुम्बिनी विकास कोषया उपाध्यक्ष भिक्षु मैत्तेयं बोधिमत च्याकाः ज्याझ्वःया उलेज्या यानाबिज्यासें कोषया भाला कयाः थम्हं उकियात कार्यान्वयन यानावयाच्वनागु खँ कनाबिज्यात ।

लिसें भिक्षु मैत्तेयं सगरहवाय् शाक्य स्मृतिविहार दयेकेगु तसकं बांलाःगु खँ खः धयाबिज्यासें उकिया निंतिं थम्हं नं फक्व ग्वाहालि यायेगु प्रतिवद्धता प्वंकाबिज्यात । अथे हे वय्कलं सगरहवाय् म्होतिं नं दछिया छक्वः जक जूसां शाक्य परिवारं उगु थासय् पुजा व भ्रमण यायेत वया च्वनेमाः धयाबिज्यात ।

संघया न्वकु अमिरमान शाक्यं लसकुस यानादिसें शाक्यवंशया गौरवया विषययात कयाः नुगःखँ तयादीगु खःसा मूछ्याञ्जे संघरत्न शाक्यं स्मृति विहार दयेकेमाःगु आवश्यकता बारे स्पष्ट यानादीगु खः ।

बागमति प्रदेशया सांसद शैलेन्द्रमान वज्राचार्य व येँ महानगरपालिकाया पुलांम्ह मेयर विद्यासुन्दर शाक्यं नं स्मृति विहार दयेकेत थःपिंसं थःथःगु थासं फूचाःगु ग्वाहालि यायेगु प्रतिवद्धता प्वंकादीगु ज्याझ्वलय् संघया दुजः आनन्दरत्न शाक्यं नं नुगःखँ तयादीगु खः ।

येँ देय्या दकलय् थकालिम्ह चक्रेश्वर आजु मोहनरत्न वज्राचार्ययात मदुम्ह ध्रुवरत्न शाक्यं नीस्वनादीगु ध्रुवतारा सम्मान नं लःल्हाःगु ज्याझ्वलय् संघया नायः शाक्यया ज्याःजंक्वया लसताय् वय्कःयात हनेज्या नं याःगु खः ।

बुद्ध जन्मभूमि लुम्बिनी जःखःया सगरहवाय् जुजु विद्रुदभया पालय् द्वलंद्वःशाक्यतय्त निर्ममतापूर्वक नरसंहार याःगु थाय्कथं कयातःगु दुसा थ्व हे थासय् संघं स्मृति विहार दयेकेत पहल यानावयाच्वंगु दु ।