खुसि सिथं ४० मिटर छेँ दने मदु

येँ (नेपालभाषा टाइम्स)÷स्वनिगःया बागमति, बिष्णुमति व मनहरा खुसि सिथय् आः ४० मिटर तक छेँ दने दइ मखु धकाः सर्वोच्च अदालतं याःगु फैसलायात कयाः स्वनिगःया स्थानीय जनतां सरोकार प्वंकूगु दु । चछि वा वयेवं खुसिया जःखः लागाय् समेत खुसिबाः वइगु जुइवं खुसि व खुसिया लागा बचे यायेमाल धकाः लाःगु रिटय् फैसला यासें सर्वोच्चं थ्व आदेश बिउगु खः ।

खुसि सिथं ४० मिटर तक छुं नं निर्माण याये दइ मखु धासें यदि निर्माण यानातःगु दुसां उकिया क्षतिपूर्ति बियाः अधिग्रहण यानाः का धकाः सरकारयात सर्वोच्चं आदेश बिउगु खः ।

सर्वोच्चपाखें थ्व फैसला वयेवं येँ महानगरपालिकाया मेयर बालेन साहं उकियात लसकुस यानादीगु दु । वय्कलं सर्वोच्चया फैसलायात आः थःपिंसं पालना याना यंकेगु धासें आवंलि खुसि सिथय् ४० मिटर थुखे छेँ दनेगु लागिं नक्सापास मयायेगु खँ नं धयादीगु दु ।

थ्व मापदण्ड न्हापा २० मिटर जक दुगु खः । आः उकियात निदुगं यानाः ४० मिटर याःगुलिं स्वनिगःया स्थानीयवासी धाःसा चिन्तित जूगु दु ।