रञ्जन कोइराला जेलमुक्त प्रकरण : ‘आः मनू स्यायेत सुं ग्याइमखुत’

येँ (नेपालभाषा टाइम्स) – थः कलाःयात स्याःगुलिं सर्वस्वसहित जन्मकैदया सजाय फयाच्वंम्ह सशस्त्र प्रहरीया पुलांम्ह डिएसपी रञ्जन कोइराला म्हिगः जेलमुक्त जूगु दु। छुं न्हि न्ह्यव सर्वोच्च अदालतं हे कोइरालां साढे ८ वर्ष जक जेल च्वंसां गाः धकाः फैसला यानाबीवं कोइराला म्हिगः सुथय् साढे ११ बजे पाखे जेलं मुक्त जूगु खः ।

कोइरालायात तारा रेग्मी नांयाम्ह मिसां डिल्लीबजारस्थित जेलय् वयाः कया यंकूगु खः । रेग्मी जेलय् थःत कोइरालाया कलाः धकाः नां च्वकूगु खः । रेग्मीया हे कारणं कोइरालां थः कलाः गीता ढकालयात स्याःगु अनुमान नं जुयाच्वंगु खः ।

मेखे सर्वोच्चं कोइरालायात साढे ८ वर्ष जक जेल भुक्तान याःसां गाः धकाः न्यंकूगु फैसलायात धाःसा प्यखेरं विरोध जुयाच्वंगु दु। सामाजिक सञ्जालय् न्यायाधीशतय्सं ध्यबा नयाः थ्व हत्याकाण्डय् दोषीया सजाय म्हो याःगु धकाः विरोध जुयाच्वंगु दु। हत्या जूम्ह गीता ढकालया अबु नं सर्वोच्चया थ्व फैसलां गलत नजीर च्वंगु खँ धाःगु दु। अथेहे महान्यायाधिवक्ताया कार्यालयं नं सर्वोच्चया फैसला विरुद्ध पुनरावलोकनय् वंगु दु।

महान्यायाधिवक्ताया कार्यालयं म्हिगः सर्वोच्चय् थ्व फैसलाया पुनरावलोकन यायेत निवेदन दर्ता यायेधुंकूगु दु । सर्वोच्चया फैसला चित्त बुझे जुइकथं मजूगु धासें महान्यायाधिवक्ताया कार्यालयं थ्व फैसलाया पुनरावलोकनय् वंगु खः ।

कोइरालायात प्रधानन्यायाधीश चोलेन्द्र शम्शेर जबरा व न्यायाधीश तेजबहादुर कार्कीया इजलाशं जेलमुक्त यायेगु फैसला न्यंकूगु खः । अदालतं थ्व हत्याकाण्ड जूगुलि हत्या जूम्ह कलाःम्हेसिया दोष दुगु, आवेशय् वयाः हत्या जूगु, उमि मस्तय्त स्वयेगु जिम्मेवारी नं दुगु धासें दोषी कोइरालाया सजाय ११ वर्ष क्वपालाः साढ ८ बर्ष जक यानाबिउगु खः । हत्या जूम्ह कलाःम्ह गीता ढकालया अबुं सर्वोच्चया थ्व फैसलां समाजय् बांलाःगु सन्देश मवनीगु खँ धासें आः सुं नं मनूत स्यायेत ग्याइमखु धकाः धयादीगु दु ।

‘मनू स्याःसां सर्वोच्चं हे सजाय क्वपालेगु यात धाःसा सु मनू स्यायेत ग्याइ’ वय्कलं धयादीगु दु। सशस्त्रया पुलांम्ह डिएसपी कोइरालायात २०६८ माघ ८ गते ज्वंगु खः । उबलय् वं थः कलाःयात महाराजगञ्ज स्थित थःगु हे छेँय् स्यानाः पालुङ्गय् यंकाः च्याकेयंकूगु खः । कलाःयात च्याका थकागु थासय् हाकनं वनाः स्वयाः लिहां वयाच्वंबलय् थानकोटय् वयात ज्वंगु खः ।