हानं सीएमसी हे हयेगु तयारी

मेलम्ची याकनं सिधयेकेत पुलांगु कम्पनीलिसे वार्ता

येँ – मेलम्ची खानेपानी आयोजनाया ठेक्का रद्द यायेधुंकाः नं खानेपानी मन्त्री बिना मगरं धाःसा अझं बिसिउँ वंगु इटालियन ठेकेदार कम्पनी सीएमसीयात हेलित हयेगु कुतः यानाच्वंगु खँ सीदुगु दु । उकिया निंतिं मन्त्री मगरं थः प्रतिनिधियात सिंगापुर छ्वयाः सीएमसीया प्रतिनिधिलिसे वार्ता तकं याके धुंकूगु खँ सूत्रं धाःगु दु ।

मन्त्री मगरं सीएमसीयात अझ नं ल्यं दनिगु ज्या यायेगु निंतिं इनाप यानाच्वंगु खँ सूत्रं धाःगु दु । सीएमसीलिसे सम्झौता त्वाःथलाः ल्यं दुगु ज्या यायेगु लागिं न्हूगु टेन्डर आह्वान यानाः ठेकेदार ल्ययेबलय् आपाः ई काइगु जुयाः सीएमसीयात हे ज्या याके बिल धाःसा कानुनी रुपं नं छुं समस्या मवइगु व ज्या नं इलय् क्वचाइगु जुयाः मन्त्री मगरं सीएमसीयात हे ल्यं दुगु ज्या यायेत इनाप यानादीगु खँ सूत्रं धाःगु दु ।

मन्त्रालयं सीएमसीलिसे ठेक्का रद्द याःसां नं स्वापू धाःसा तयाच्वंगु खँ सूत्रं धाःगु दु । आयोजनाया आपालं धयाथें ज्या क्वचायेधुंकूगुलिं न्हूगु टेन्डर यायेबलय् उकिं लागत नं अप्वइगु, कानुनी झमेला वये फइगु, सीएमसीलिसे ज्या याःपिं नेपाःमि ज्यामि व ढुवानीकर्तात पाखें ग्वाहालि मजुइगु व ई नं अप्वः काइगु जूगुलिं मन्त्रालय अझ नं सीएमसीयात हे ज्या याकेगु पक्षय् वंगु खँ धाःगु दु ।

सूत्रया कथं वंगु वालय् मन्त्री मगरं प्रतिनिधि छ्वयाः सिंगापुरय् वार्ता याकूगु व उगु वार्ता सकारात्मक जूगु खँ धाःगु दु । सूत्रया कथं सीएमसीं लागत अप्वःगुलिं मन्त्रालय छुं भचा लचक जुल धाःसा थःपिं अझ नं मेलम्चीइ ज्या यायेत तयार दुगु सन्देश छ्वयाहःगु दुसा नेपाःपाखें नं वैधानिक व कानुनी प्रक्रिया स्वयाः छुं लचक जुइगु सन्देश सीएमसीयात छ्वःगु दु ।

निगुलिं पक्षया वार्ता लिपा सकारात्मक जूगु खँ सूत्रं धाःगु दु । मेलम्चीया जिम्मा मेगु कम्पनीयात बीबलय् न्हूगु सम्झौता यायेमाली । उगु ज्या थाकुगु जक मखु लागत नं छक्वलं थहां वनी लिसें ई नं अप्वः काइ । उकिया नापं न्हापाया निर्माण कम्पनीया बक्यौताया झमेलाया नैतिक दायित्व नं सरकार व आयोजनां काये माली ।

अथेजुयाः हे सीएमसी लिसे समझदारी यायेगु हे बांलाइगु जुयाः मन्त्रालयं उकिया हे तयारी यानाच्वंगु खँ धाःगु दु । सरकार व सीएमसीं ठेक्का त्वाःथलागु निर्णय लित कायेवं ज्या न्ह्याकेत अःपुइगु जूगुलिं नं सरकारं सीएमसीयात लित हयेगु कुतः यानाच्वंगु खः । सीएमसीया मागयात समबोधन यायेगु ज्या जुल धाःसा ज्या न्ह्याकेत समस्या मदुुगु खँ नं मन्त्रालय सूत्रं धाःगु दु ।

सूत्रया कथं मन्त्रालयपाखें इटाली कम्पनीयात ज्या सिधःलिसे बीमाःगु ध्यबा तकं इलय् मबिउगु जुयाः सीएमसी कम्पनी आः अन्तर्राष्ट्रिय अदालतय् वने फुगु व उकी बुत धाःसा नेपालं अर्बौं तकाया क्षतिपूर्ति समेत पुले मालीगु खतरा समेत पिहां वयाच्वंगुलिं नं नेपालं थःगु निर्णय हिले माःगु खः ।

 

सम्बन्धित बुखँ

LEAVE YOUR COMMENTS