तुकुचा खुसिया सुचुकुचु
येँ(नेपालभाषा टाइम्स) येँ महानगरपालिका २८ वडापाखें तुकुचा खुसिया सरसफाइ शुरु याःगु दु । २८ वडा ज्याकुथिं थनया कमलादीनिसें नेशनल ट्रेडिङतक तुकुचा क्षेत्र व उकिया जःखःया लागाय् सुचुकुचु याःगु खः ।
वडा ज्याकुथिं स्काभेटर हयाः खुसि सुचुकुचु यायेगु नापं तुकुचा हे त्वपुइकथं खुसि जःखः बुया वयाच्वंगु फोहर, घाँय्, सिमा ध्यनाः सुचुकुचु याःगु खः । वडा ज्याकूपाखें तुकुचा सुचुकुचु यायेत चालु आर्थिक दँय् १० गू लख विनियोजन याःगु वडा सदस्य वीरेन्द्र महर्जनं कनादीगु दु ।
तुकुचा सुचुकुचु नापं मन्त्रिपरिषद्या निर्णयकथं खुुसि जःखःया ४÷४ मिटर भाग खुल्ला त्वःतेमाःगु मापदण्ड कायम यायेत नं वडा ज्याकूपाखें पहल न्ह्याकूगु वडा सदस्य महर्जनं कनादीगु दु । थुगु लागाय् लाःगु तुकुाया जःखः खुसिया मापदण्ड हाचां गायाः पद्मकन्या क्याम्पस, शंकरदेव क्याम्पस, समाज कल्याण परिषदं संरचना निर्माण यानातःगु वडा ज्याकुथिं न्ह्यथंगु दु ।
वडाअध्यक्ष भाइराम खड्गी थम्हं तुकुचा खुसिया मापदण्ड कायम व पालना याकेत महानगर सभाय् तःक्वः खँ ल्वहनागु नं कनादिल । वय्कलं महानगरया प्रहरी परिचालन यानाः जूसां मापदण्ड कायम याकेत लगे जुइगु प्रतिवद्धता नं प्वंकादीगु दु ।
उच्च अदालत पाटनं तुकुचायात खुसि हे खः धकाः फैसला यायेवं उकिया सुचुकुचु यायेगु नापं खुसि सिथय्या मापदण्ड पालना याकेत ज्या न्ह्याकागु महानगरपालिकां न्ह्यथंगु दु ।
LEAVE YOUR COMMENTS