नेपालभाषा भाय्लचं ज्यासः मुँज्या

येँ(नेपालभाषा टाइम्स)- नेवाः देय् दबू येँ महानगर समितिया ग्वसालय् छन्हुया नेपालभाषा भाय्लचं ज्यासः मुँज्या जुल । वंगु शनिवाः देय् दबूया केन्द्रीय ज्याकू टेकुइ च्वंगु काठमाडौं विजनेश पार्कय् जूगु खः ।

मुँज्याय् भाषाविज्ञ विष्णु चित्रकारं नेपालभाषाया ब्याकरणयात न्हापा गुकथं छ्यलेगु यानाच्वंगु व आः गुकथंया परिमार्जन जुया वयाच्वन धइगु बारे प्रशिक्षण बियादीगु खः ।
लिसें वय्कलं नेपालभाषाया भाय्लचं (ब्याकरण)य् लिफुति, सिन्हःफुति, मिलाफुति, ह्रस्व इकार व दीर्घ इकारया छ्यलाबुला गनं गुकथं यायेगु, एक वचन व बहुवचनय् गुकथंया खँग्वःत छ्यलेगु धइगु बारे नं जानकारी बियादीगु खः ।

प्रशिक्षणया हे झ्वलय् नेपालभाषाया आखःग्वः च्वयेबलय् बागःया प्रयोग धइगु जुइ मखु धासें दसूत न्ह्यब्वयादीगु खःसा क्रियाय् वनेबलय् गन छु प्रयोग यायेगु धइगु बारे नं कनादीगु खः ।

येँ महानगरया थीथी सामुदाियक ब्वनेकुथिइ नेपालभाषा विषय ब्वंकाच्वंपिं स्यनामि, संचारकःमि, नेपालभाषाय् एमफिल अध्ययन यानाच्वंपिं ब्वँमिनापं ब्वनेकुथिइ नेपालभाषा ब्वनाच्वंपिं विद्याथीतय् सहभागिता दुगु खः । प्रशिक्षणया थीथी पक्षयात कयाः रश्मि नापित, जियम श्रेष्ठ, रोशन सिं महर्जन, उदेन न्हूसाय्मि लगायतं जिज्ञासा तयादीगु खः ।

ज्याझ्वलय् भाय्लचं कक्षाया आवश्यकतायात कयाः देय् दबूया नायः पवित्र वज्राचार्य, न्वकु उमेश स्थापित, ‘नेपालभाषा टाइम्स’या सम्पादक सुरेश मानन्धर, नेपालभाषा शिक्षा विभागया दुजः गुह्येश्वरी श्रेष्ठ लगायतं नुगःखँ तयादीगु खः ।

भाय्लचं ज्यासः मुँज्या देय् दबू महानगर कमिटीया छ्याञ्जे अर्विन्द्रमान सिंहया संयोजनय् जूगु खः ।

सम्बन्धित बुखँ

LEAVE YOUR COMMENTS