‘मस्तय्त सक्रिय यायेफःसा जक भाषाया विकास जुइ’
येँ (नेपालभाषा टाइम्स)- नेपालभाषा मचासाहित्यया समस्या व प्रवद्र्धनया उपाय विषयय् म्हिगः छगू बिचाः गोष्ठी जुल । नेपालभाषा एकेडेमीया ग्वसालय् जूगु बिचाः गोष्ठी वरिष्ठ मचासाहित्यकार शान्तदास मानन्धरया मू पाँहांसुइ जूगु खः ।
ताःइलंनिसें मचा साहित्यय् ल्हाः न्ह्याकाः वयाच्वनादीम्ह व वि.सं. २०२० सालया नेपालभाषाया छम्ह न्ह्यलुवा शान्तदास मानन्धरं थःगु नुगः खँ प्वंकेगु झ्वलय् थः मचा साहित्यकार मखु, मचा काइम्ह ज्यामि जक खः धयादिल । मचातय्त पासा दयेकीपिं ज्या मवः धाइगु झीगु समाजय् मचातय्त सक्रिय यायेफत धाःसा तिनि झीगु भाषा, साहित्यया विकासय् तिबः जुइ धयादिल । झीसं झी मस्तय्त छु ब्वंकेगु धयागु बारे स्पष्ट जुइमाः धासें वय्कलं यूरोपियनतय्गु नक्कल यानाः मचा साहित्यय् फ्यान्टासी विषय ब्वंकेगु यात धाःसा झीगु गतिपति दइमखु धासें झीसं झीगु हे संस्कार संस्कृति व झीगु परिवेशया विषयवस्तु दयेकाः साहित्य च्वयेमाः खँय् बः बियादिल ।
ज्याझ्वःया मेम्ह वक्ता व मचा लय्पौ ईल्वहं प्रकाशन संस्थाया हामा नरेशवीर शाक्यं मचातय्त यःगु जक मखु ल्वयेक व मचातय्त संस्कारित यायेत, नैतिकता, आत्मविश्वास ब्वलंकेत व झीगु संस्कार स्यनेत, ब्वंकेत मचासाहित्य च्वयेमाःगु खँ कनादिल । मचासाहित्यया समस्या धयागु हे झी थः हे खः धासें वय्कलं मचा साहित्य ब्वनीपिं व ब्वंकीपिं हे कुतः मयाःगु खँ कुलादिल । झीके मेमेगु भाषाया पत्रिका दयाच्वनी तर थःगु हे भाषाया पत्रिका स्वयेगु कुतः झीसं याना मच्वनागु हे थुकिया समस्या खः धयादिल ।
मचासाहित्यय् स्यल्लाःगु ल्हाः न्ह्याकाच्वनादीम्ह लोककवि राजभाई जकःमिं लिखित रुपं हे मचासाहित्यया समस्या व थुकियात प्रवद्र्धनया उपाय बारे कुलादीगु उगु ज्याझ्वलय् छगू दशकं मल्याक स्कूलय् नेपालभाषा स्यनेगु ज्या यानाच्वनादीम्ह शिक्षिका रमिता वज्राचार्य नं थःगु नुगः खँ प्वंकादीगु खः ।
नेपालभाषा एकेडेमीया चान्सलर यज्ञरत्न धाख्वाया नायःसुइ जूगु उगु ज्याझ्वलय् एकेडेमीया कार्यसमितिया दुजः व साहित्य कवःया कजि त्रिरत्न शाक्यं लसकुल यानादीगु खःसा मेम्ह दुजः शाक्य सुरेनं सुभाय् देछायादीगु खः ।
LEAVE YOUR COMMENTS