प्रेमध्वज प्रधान सम्मान लःल्हात

यल (नेपालभाषा टाइम्स)– गोल्डेन भ्वाइस प्रेमध्वज प्रधानया जन्मजयन्तीया झ्वलय् स्वम्ह स्रस्तापिंत सम्मान याःगु दु । प्रधानया ८७ दँ बुन्हि कुन्हु लाकाः प्रेमध्वज प्रधान स्मृति प्रतिष्ठान पाखें वरिष्ठ गीतकार किरण खरेल, वरिष्ठ सितारवादक उस्ताद तारावीर सिंह तुलाधर व गायिका मिलन नेवारयात सम्मान याःगु खः ।

सम्मानितपिंत वरिष्ठ साहित्यकार व लोकसंस्कृतिविद् तुलसी दिवसं खादा क्वखायेकाः हनापौ लःल्हाःगु खःसा गायक प्रधानया जहान किरण प्रधानं दां सिरपाः लःल्हाःगु खः । गितकार खरेलयात छगू लाख तका सहित प्रेमध्वज राष्ट्रिय संगीत सम्मान, सितारवादक तुलाधरयात ७५ हजार तका सहित प्रेमध्वज स्मृति राष्ट्रिय वाद्यवादन संगीत सम्मान व व गायिका नेवारयात ५० हजार तका सहित प्रेमध्वज स्मृति राष्ट्रिय युवा संगीत सिरपाः लःल्हाःगु खः ।

ज्याझ्वलय् न्ववासें वरिष्ठ गितकार राजेन्द्र थापां गायक प्रधानयात मनूतय्सं ‘मखमली’ सःया धनी धकाः नं धायेगु याः, तर वय्कःयात धाःसा थथे धाइगु मयः धकाः धयादिल । ‘जितः न्ह्याबलें वय्कलं न्यनाच्वनीगु ‘थ्व मखमली सः धाःगु छु ?’, अले जिं धायेगु ‘नाइसे च्वंगु सः धाःगु का ।’, अले वय्कलं धयादी, ‘नाइसे च्वंगु धाःगु ला रेशम जकं जुइकाः, मखमली स्वानं ला सुइ जक यः का ।’

प्रधानयात भारतीय संगीतकारतय्सं हे ‘गोल्डेन भ्वाइस अफ एशिया’ धकाः धाःगु धासें वय्कःयात गोल्डेन भ्वाइस हे धायेगु बांलाःगु खँ गीतकार थापां धयादिल ।
अथेहे गीतकार दिनेश अधिकारीं प्रेमध्वज प्रधान, सम्मानित व्यक्ति किरण खरेलपिनि म्ये रेडियो नेपालय् रेकर्ड जुइधुंकाः हे जक नेपालय् हिन्दी म्येया दबदबा मदयावंगु खँ लुमंकादिल ।

ज्याझ्वलय् आनन्द कार्की, मिलन नेवार, सुरज थापा व उदेश श्रेष्ठं प्रधानया म्येँ न्यंकूगु खः ।