कलाकारिता ख्यःयात राज्यया न्यागूगु अंगकथं मान्यता बीत माग

येँ– कानून न्याय तथा संघीय मामिलामन्त्री शेरबहादुर तामाङं नेपाली कलाकारिता ख्यःया विकासया लागिं क्वात्तूगु पलाः ल्ह्वनेगु धयादीगु दु । नृत्य निर्देशक संघ नेपालं थौं येँय् ग्वसाः ग्वःगु ‘नृत्य गुरुआमा हनी श्रेष्ठ सम्मान साँझ २०७४ तथा सांस्कृतिक कार्यक्रम’यात सम्वोधन यासें कानूनमन्त्री तामाङं कलाकार मनोरन्जनया माध्यम जक मखसें, देय्या म्हसीका हे जूगु धासें कलाकारिता ख्यःया विकासया नितिं थम्हं हर सम्भव कुतः यायेगु धयादिल । राज्यं कला ख्यः अले कलाकारया सम्मान इलय् हे यायेमाःगुलिइ तामाङं बः बियादिल ।

व स्वयां न्ह्यः, उगु हे ज्याझ्वलय् कानूनमन्त्री तामाङं नेपाःया न्हापांम्ह नृत्य प्राध्यापक लिसें नृत्य निर्देशक हनी श्रेष्ठयात हनादिल । ज्याझ्वलय् मन्त्री तामाङं ताम्रपत्र लःल्हासें नृत्य गुरुमा श्रेष्ठयात हनादिल । व हे कथं, श्रेष्ठयात नृत्य निर्देशक संघ नेपालया केन्द्रिय नायः भुवनदास श्रेष्ठं दोसल्लां न्ययेकादिलसा संघया छ्यान्जे ज्ञानबहादुर महर्जनं डि–डान पदकपाखें श्रेष्ठयात हनादिल । कार्की ब्यांक्वेटया नायः दिलबहादुर कार्कीं रु.२५,५५५ राशिया चेक श्रेष्ठयात लःल्हानादिल ।

सम्मान ज्याझ्वलय् लसकुस यासें ज्याझ्वः कजि लिसें संघया केन्द्रिय दांभरिं भावना कार्कीं राज्यं कलाकारिता ख्यःयात राज्यया न्यागूगु अंगया रुपं मान्यता बीमाःगु माग लिसा कयादिल । कलाकार ब्वयेगु ज्वलं जक मखसें राज्यया म्हसीका हे जूगुलिं कलाकारिता ख्यःयात राज्यया न्यागूगु अंगया रुपं मान्यता बीमाःगु कार्कीया धापू खः । देय्न्यंकया नृत्य निर्देशकपिं संगठित जुयाः संघ नीस्वंगु न्हि श्रावण २६यात राष्ट्रिय नृत्य दिवसया रुपं घोषणा यायेमाःगु माग नं कार्कीं न्ह्यःने तयादिल ।

२०१५ सालय् विद्यार्थी जीवननिसें हे नृत्यया शुरुवात यासें थौंतक नं न्हूपिं नृत्यकारपिंत प्रशिक्षण बीगु, नृत्य सयेकाच्वंपिं विद्यार्थीपिनिगु लागिं नृत्य सम्बन्धि पाठ्यपुस्तक विकास यायेगुनिसें थुगु ख्यलय् निरन्तर योगदान बियाच्वंगुयात च्वछासें हनी श्रेष्ठयात सम्मानित याःगु खः ।

सम्मान धुंकाः नेपाःया थीथी जातजातीया संस्कृति खनेदइगु लोक, मौलिक नेपाली हुलाप्याखंया लिसें पाश्चात्य हुलाप्याखं नं न्ह्यब्वःगु खः । ज्याझ्वलय् शास्त्रीय चर्या प्याखं, लोक हुलाप्याखं, कत्थक, भरतनाट््यमया लिसें संकिपा हुलाप्याखं, दोहरी, रियालिटि शोया उत्कृष्ट जूगु हुलाप्याखं, फ्रिस्टाइल, बेलि हुलाप्याखं न्ह्यब्वःगु खः ।