नेवाःतय्सं बिस्कं शहीद दिवस हनीगु

येँ – पहिचान पक्षधर नेवाःतय्सं थुगुसी माघ १६ गते शहीद दिवस हनीगु जूगु दु। पहिचानया मुद्दायात ज्वनाः आन्दोलनय् कुहां वयाच्वंपिं थीथी राजनीतिक दललिसे आवद्ध नेवाःतलिसें पहिचान पक्षधर कार्यकर्ता, थीथी खलः पुचःया दथुइ जूगु मुँज्यां बिस्कं शहीद दिवस हनेगु निर्णय याःगु खः ।

२००७ सालय् देसय् क्रान्ति यानाः प्रजातन्त्र हयेगु निंतिं धर्मभक्त माथेमा, शुक्रराज शास्त्री जोशी, गंगालाल श्रेष्ठ व दशरथ चन्दं थःगु प्राण आहुति बिउगु खः । थुपिं हे प्यम्ह महान शहीदया लिसें देय् परिवर्तनया निंतिं जूगु थीथी आन्दोलनय् शहादत प्राप्त याःपिं शहीदया लुमन्तिइ उकथं बिस्कं शहीद दिवस हनेत्यंगु खः ।

थ्व हे झ्वलय् प्रदेश नं. ३या प्रदेशसभाया बैठकं छुं दिं न्ह्यः जक प्रदेशया नां बागमति तये धुंकाः आः पहिचानया निंतिं जुयाच्वंगु आन्दोलनया लँपु गुखे ? धइगु विषययात कयाः याकनं छगू तःजिगु विचाः गोष्ठि याइगु जूगु दु। पहिचान विनाया नामाकरणं पहिचानया निंतिं जुयाच्वंगु आन्दोलनयात ध्याकुनय् लाकेगु ज्या जूगु धासें पहिचानया आन्दोलनयात आः न्हूगु हे धंगं न्ह्यःने यंकेगु निंतिं नेवाः न्ह्यलुवापिनिगु दथुइ मुँज्या व सहलह जुयाच्वंगु अवस्थाय् आः तत्कालया ज्याझ्वःकथं शहीद दिवस हनेगु व थीथी ज्याझ्वःत याना वनेगु निर्णय उगु मुँज्यां याःगु खः ।