थप ३६म्हेसित कोरोनाया संक्रमण, संत्रमिततय् ल्याः ५८४म्ह थ्यन

येँ – नेपालय् थप ३६म्हेसित कोरोना भाइरसाया संक्रमण खनेदुगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटां बैतडीइ ४म्ह, झापाय् १म्ह, बाँकेय् २७म्ह, बर्दियाय् १म्ह व सुर्खेतय् ३म्हेसित कोरोना पुष्टि यानादीगु दु ।

सेती अस्पतालया प्रयोगशालाय् याःगु परीक्षणय् बैतडी शिवनाथ गाँउपालिकाया २०, २२, २२ व २७दँया मिजंत व कोशी अस्पतालया प्रयोगशालाय् याःगु परीक्षणय् झापाया डिल्लराम मावी क्वारेन्टाइनय् दुम्ह ३३दँया मिजंयात संक्रमण जूगु दु ।

अथेहे राप्ती स्वास्थ्य विज्ञान प्रतिष्ठानय् याःगु परीक्षणय् बाँकेया नरैनापुर मदरसाया १७ निसें ३२दँया ६म्ह मिजंत, नरैनापुर–३ राष्ट्रिय प्रावि गेगलीइ संकलनया नमुनाय् १६ निसें ३२दँया १५म्ह मिजंत, रनैनापुर–१ बाँकेया राष्ट्रिय प्रावि स्कूल महातनीइ संकलनय याःगु नमुनाय् २२ निसें ५०दँया ६म्ह मिजंत, बर्दियाया बदैयातालया १९दँया छम्ह मिजं व सुर्खेतय् २म्ह मिजं व छम्म्ह मिसायात संक्रमण जूग दु ।

थौं सुथय् जक ३२म्ह मनूतय्त कोरोनाया संक्रमण जूगु खः । थौं जक नेपालय् ६८म्ह संक्रमण जूगु दु । थ्व नापं नेपालय् संक्रमिततय् ल्याः मुक्कं ५ सय ८४म्ह थ्यंगु दु ।