ने. सं. ११४४ ञलाथ्व दशमी -

दकलय् तग्वःगु जहाज

विश्वय् दकलय् तग्वःगु हवाइजहाज छु खः ? यदि सुनानं छितः न्यन धाःसा छिं शायद ‘बोइङ, कार्गो वा जेट, कंकड आदि विमानया नां कयादी जुइ । लुमंकादिसँ थुपिं छुं नं जहाज विश्वया दकलय् तग्वःगु जहाज मखु । विश्वया दकलय् तग्वःगु जहाज खः ‘स्ट्र्याटोलन्च ।’ थ्व जहाजं हालय् जक न्हापाखुसी उडान याःगु दु ।

स्ट्र्याटोलन्चं न्हापांखुसी सफल परीक्षण उडान यायेगु झ्वलय् ४,५७२ मिटरया दूरी पार याःगु खः । जहाजय् दइगु पपूया लिधंसाय् स्ट्र्याटोलन्च जहाजयात विश्वया हे दकलय् तग्वःगु जहाज नालाकाःगु खः । थ्व जहाजं उडान याःगु इलय् प्रतिघन्टा २ सय ७४ किलोमिटरया गतिं उडान याःगु अन्तर्राष्ट्रिय संचारमाध्यमं न्ह्यथंगु दु ।

पपूया लिधंसाय् संसारया हे दकलय् तग्वःगु जहाजकथं कयातःगु थ्व जहाजय् जडान यानाःगु पपूया हाकः जक हे ११७ मिटर ताःहाकः । अथे हे थ्व जहाजय् खुगः इन्जिन दु । स्ट्र्याटोलन्च कम्पनीं निर्माण याःगु थ्व जहाजं पृथ्वीया अक्षय् च्वंगु भू–उपग्रहतकया यात्रा सहज जुइगु विमान निर्माण कम्पनीया दावी दु ।

थ्व विमान स्वयेबलय् नं अजू चायापु । छाय्कि आतक झीसं गुलि नं जहाज खनाच्वनागु दु, व दक्वं छगः बडीया खः । तर स्ट्र्याटोलन्च जहाज स्वयेबलय् हे निगः जहाजया बडी स्वानाः दयेकातःगु थें खनेदु । निगः जहाजया बडी स्वानाः दयेकातःगु थ्व जहाज संसारया हे दकलय् तग्वःगु जहाज जूगु दावी नं निर्माण कम्पनीया दु ।