रिजालयात नं आक्रमण

येँ – नेपाली कांग्रेसया नेता डा. मिनेन्द्र रिजालयात नेपाल कम्युनिष्ट पार्टीया कार्यकर्तातय्सं तनहुँलय् आक्रमणया कुतः याःगु दु । तनहुँया रिसिङ गाउँपालिका भवन शिलान्यास यायेत वनाच्वंम्ह रिजालयात दमौलीं रिसिङ गाउँपालिका वनेगु लँय् आक्रमणया कुतः याःगु खः ।
नेकपा कार्यकर्तातय्सं रिजालयात गाउँपालिका ज्याकुथि वने मबीत लँय् सिमा पालाः लँ पनेगु लिसें अप्पां कयेकाः पंगः थनेगु ज्या याःगु खः ।

लिपा नेपाली कांग्रेस कार्यकर्तातय्सं रिजालयात सुरक्षित रुपं ज्याझ्वः जुइगु थासय् यंकूगु खः । नेकपाया कार्यकर्तातय्सं ज्याझ्वः जुयाच्वंगु थासय् थ्यनीगु ८ नम्बर वडाय् स्वघौ तक रिजालयात पनातःगु खः । नेकपाया कार्यकर्तां पंगः थंगु खँ सीवं कांग्रेसया कार्यकर्तात नं अन थ्यंगु खः । वयां लिपा नेकपाया कार्यकर्ता चिलावंगु खः ।

नेता रिजालं थःत जूगु आक्रमण निन्दनीय खः धासें उकियात कयाः भत्र्सना यानादीगु दु । लिसें वय्कलं लोकतन्त्रयात खतरा दुगु खःसा वर्तमान सरकारपाखें हे दुगु द्वपं नं बियादीगु दु । थ्वहे झ्वलय् कांग्रेसया वरिष्ठ नेता रामचन्द्र पौडेलं छगू विज्ञप्ति जारी यासें नेता रिजालयात जूगु आक्रमण जनमतया अपमान खः धयादीगु दु । वय्कलं पाहांयात पिहाच्वंपिं जनताया अपमान यासें नेकपाया कार्यकर्तां ‘मण्डले’ शैलीं रिजालयात पंगः थंगु द्वपं नं बियादीगु दु ।