वातावरणीय मौलिक हकया निंतिं विद्यालय परिसरय् वृक्षारोपण

येँ(नेपालभाषा टाइम्स)- येँ महानगर पालिका १३ वडा कालिमातिस्थित जन प्रभात माध्यमिक विद्यालय परिसरय् वंगु सोमवाः वृक्षारोपण याःगु दु । वायु प्रदूषण व्यवस्थापन संजालया ग्वसालय् उगु वृक्षारोपण ज्याझ्वः याःगु खः ।

विश्व वातावरण दिवसया लसताय् ‘प्लाष्टिक प्रदूषण विरुद्ध लगे जुइ नु’ धइगु नारा बियाः स्वच्छ वातावरणीय मौलिक हकया निंतिं जूगु वृक्षारोपणय् थीथी जडीबुटी व सिसाबुसाया १०८ मा वृक्षारोपण याःगु खः । पर्यावरण स्वच्छता अप्वयेकेगु उद्देश्यं विद्यालय परिसरय् थीथी प्रजापतिया वृक्षारोपण यानागु संजालया अध्यक्ष निरु महर्जनं कनादिल ।

वातावरण प्रदूषणया कारणं प्वाथय् दुम्ह मचाया न्ह्यपुइतकं प्रतिकूल लिच्वः लाकीगु जूगुलिं स्वच्छ श्वास प्रश्वासया निंतिं वृक्षारोपण मदयेक मगाःगु छगू अपरिहार्य ज्या जूगु वय्कःया धापू दु । मुक्कां विश्व हे वातावरण प्रदूषणया कारणं आक्रान्त जुयाच्वंगु धासें वनस्पति, मनू, जीवजगत लिसें सकल प्राणीया गुणात्मक व परिणामात्मक स्वरुपं छम्हं मेम्हेसित लिच्वः लाकाच्वंगु वय्कलं धयादिल ।

येँ महानगरपालिका २० वडाअध्यक्ष राजेन्द्र मानन्धरं मात्र वृक्षारोपण यायेगु ज्याय् सीमित मजुसे वृक्षारोपण याःगु मायात ब्वलंकेगु ज्याय् नं पलाः न्ह्याकेमाःगु आवश्यक दुगु खँय् बः बियादिल । वय्कलं वृक्षारोपण अर्थात स्वांसिमा पीत गुलि अःपु उलि हे उकियात ब्वलंके थाकू धासें थः मस्त सुसाःकुसाः यानाः ब्वलंकूथें स्वांसिमायात नं उकथं हे विचाःसंचाः यानाः ब्वलंकेमाःगु खँय् बः बियादिल ।

विद्यालयया प्रधानाध्यापक सत्येन्द्रलाल कर्णं संजालं याःगु थुकथंया ज्याझ्वलं विद्यालय परिसरय् हरियाली न्यना वनीगु व वायु स्वच्छता कायम जुइगु विश्वास प्वंकादिल ।
विद्यालय व्यवस्थापन समितिया निवर्तमान नायः रामशरण डंगोलं वृक्षारोपणं विद्यालय क्षेत्र प्रदूषणमुक्त जुयाः हरियालीयुक्त जुइगु व थ्वपाखें विद्यार्थीतय्सं स्वास्थ्य लाभ याये फइगु विश्वास प्वंकादिल ।

थुगु संजाल छुं दिं न्ह्यः जक गठन जूगु खः । येँ महानगरपालिकां वायु प्रदूषण नियन्त्रणया निंतिं धासें विष्णुमति खुसि सिथय् लाःगु १० वडायात दुथ्याकाः संजाल गठन याःगु खः । वृक्षारोपण ज्याझ्वलय् १३ वडा सदस्य रजनी महर्जन, मैयाँ देउला, २० वडा सदस्य अनेश चित्रकारलिसें वातावरणसम्बन्धी ज्या याइगु संस्था एन्फो, विद्यालयया शिक्षक, कर्मचारी विद्यार्थी व स्थानीयया नं सहभागिता दुगु खः ।