कन्हय् महानगर दिवस

येँ – येँ महानगरपालिकां कन्हय् महानगर दिवस न्यायेकीगु जूगु दु । कन्हय् सुथय् थनया बसन्तपुली जुइगु छगू सभाय् प्रधानमन्त्री केपी ओलीं महानगर दिवसया उलेज्या यानादी । म्हिगः महानगरपालिकाया ज्याकुथी जूगु पत्रकार सम्मेलनय् मेयर विद्यासुन्दर शाक्यं महानगर दिवस बारे जानकारी बिसें उगु दिवसय् येँ देय्या न्हापांम्ह मेयर जनकमान श्रेष्ठयात हनेगु, उत्कृष्ट सामुदायिक व निजी स्कूलयात हनेगु, सुशासन पत्रकारिता पुरस्कार लःल्हायेगु, बाजं गुरुपिंत हनेगु ज्याझ्वः दुगु खँ कनादिल ।

दिवसया लसताय् शनिवाः, आइतवाः व सोमवाः स्वन्हुयंकं महानगर महोत्सव नं याइगु जूगु दु । महोत्सवय् मरु, असं, वन्दे, किलागः, लगं आदि लागाय् नेवाः नसा ब्वज्या लिसें प्रदर्शन नं याइगु ग्वसाः दु । नापसं बसन्तपूया दबुली ज्यापु महागुथि येँ जिल्लापाखें सांस्कृतिक ज्याझ्वः नं यायेत्यंगु दु ।

वि.सं. २०५२ साल मंसिर २९ गते तत्कालिन येँ नगरपालिकायात महानगरपालिका घोषणा याःगु न्हियात लुमंकाः महानगर दिवस हनेगु याना वयाच्वंगु खः । येँय् सछिदँ न्ह्यः सफाई अड्डा चायेकाः स्थानीय निकाय सञ्चालन यायेगु चलन सुरु जूगु खःसा वहे सफाई अड्डा विकसित जुजुं थौंया महानगरपालिका जूगु खः ।