नरःया सभ्यता ल्यंकेत सहलह गोष्ठि
येँ(नेपालभाषा टाइम्स)- येँ महानगरपालिका वडा नं. ५ स्थित ऐतिहासिक नरःयात सांस्कृतिक जीवन्तता ल्यंकेत सहलह जुल । लिच्छवीकालीन सभ्यताया केन्द्रकथं कयातःगु नरःया जीवन्तता ल्यंकेत ऐतिहासिक, सामाजिक, सांस्कृतिकलिसें वातावरणीय व पूर्वाधार लगायतया कोणं सहलह गोष्ठि न्ह्याकूगु खः । थ्व झ्वलय् न्हापांगु चरणय् वातावरणीय कोणयात स्थानीय व सरोकारवाला दथुइ ज्या जूगु खः ।
वडाअध्यक्ष वीरेन्द्र प्रजापतिं विगतय् नरःया ऐतिहासिक, सांस्कृतिक, सामाजिक पक्षया संरक्षण व प्रवद्र्धनय् ध्यान बी मफुगुलिं थ्व थाय्या महत्व ध्याकुनय् लानाच्वंगु खँ कनादिल । लिसें थुकिया महत्व ल्यंकेत गुरुयोजनाया विषयय् नापं संरक्षण व विकासया निंतिं स्थानीय सहभागिता सहितया कार्यविधि कार्यपालिकापाखें याकनं पारित यानाः न्ह्यःने न्ह्याः वनेगु जुइ धयादिल ।
नरःया सांस्कृतिक जीवन्तता ल्यंकेत तयार याःगु गुरुयोजनाया मस्यौदाय् आवंलि नरलय् ५० फिट स्वयां तजाःगु छेँ, भवन दने मदइगु, अज्याःगु भवन निर्माणय् लगे जुइगु नक्सा दस्तुसरय् ९० प्रतिशत तक छ्यापं बीगु, भवनया न्ह्यःनेया ब्व मौलिक शैलीं निर्माण याइगु जुल धाःसा उकी महानगरं ग्वाहालि यायेगु थेंज्याःगु विषयय् सहलह जूगु वडाअध्यक्ष प्रजापतिं कनादिल ।
अप्वया वनाच्वंगु आधुनिक सहरीकरणया कारणं ऐतिहासिक, सांस्कृतिक, धार्मिक महत्वयात कमजोर याना यंकाच्वंगु निष्कर्ष दु । आधुनिक सहरीकरणया कारणं प्राचीन स्मारक क्षेत्रया मौलिकपन ल्यंका तयेत हाथ्या वयाच्वंगुलिं आः नरःया धार्मिक, ऐतिहासिक, सांस्कृतिक, सामाजिक महत्वका थाय्, देय् दुनेया सहरी क्षेत्रयात मानव केन्द्रीत क्रियाकलापय् अभ्यस्त यायेमाःगु नं सरोकारवालातय् धापू दु ।
थुकथं हे नरःया निंतिं प्रस्तावित गुरुयोजनाया मस्यौदाय् स्मारक क्षेत्रया वातावरणीय सुधार यायेत ‘वल्र्ड कार फ्रि डे–२०२३÷या दिं सवारी निषेध ज्याझ्वः संचालन यायेत्यंगु दु ।
कार्यशालाय् एफएचआई ३६० स्वच्छ हावा परियोजनाया प्रमुखलिसें वातावरणविद् भूषण तुलाधरं थःगु प्रस्तुतिकरण बियादिसें वायु प्रदूषण नियन्त्रणया निंतिं स्थानीय समुदायस्तरय् समस्याया समाधान मालाः उपायत अवलम्बन यायेगु फइ धयादिल ।
गोष्ठिइ रीच आर्किटेक्ट पद्मसुन्दर महर्जन, सविना तुलाधरं ज्यापौ न्ह्यब्वयादिसें नरःया पुनरुत्थानया निंतिं अझं आपालं ज्या याये फइगु व प्राचीन स्वरुपयात लित हये फइगु धारणा तयादिल ।
थौं स्वयां प्यंगू दशक न्ह्यःतक ५ वडान्यंकं गुंगू पुखू दुगु खःसा आः छगू जक ल्यं दनि । अथे हे न्यागू ल्वहंहिति दुगुलिइ नं आः छगू जक दनि । थुकथं हे तुं, फल्चाय् नं म्होति वःगु दुसा थीथी जात्रा, पर्वय् पिहां वइगु १४ ताजिया बाजंमध्ये आः झिंछगू जक ल्यं दु ।
LEAVE YOUR COMMENTS