राष्ट्रिय सभा मतदान यायेत उलि हे थाकु

येँ – राष्ट्रियसभाया खाली जुयाच्वंगु छगू सिटया लागिं कन्हय् मतदान जुइत्यंगु दु । बागमती प्रदेशपाखें थुकी मतदान यायेगु लागिं मतदातात प्रदेश राजधानी हेटौंडा वने मालीगु जूगुलिं मतदान यायेत थाकुइफुगु खँ धाःगु दु । मतदानया लागिं हेटौंडाया भूटनदेवी मावियात मतदान केन्द्र दयेकातःगु दु ।

थौंकन्हय् कोरोना महामारी न्यना वनाच्वंगु कारणं यक्व मनूत छथाय् च्वनाः मतदान यायेगु तकं जोखिम जुइ फइगु खँ धाःगु दु । खतुं प्रदेशसभां मतदानय् वइपिं मतदातातय्सं ७२ घौ न्ह्यः यानातःगु पीसीआर टेस्टया रिपोर्ट क्यनेमाःगु व्यवस्था याःगु दु । यदि मतदाता कोरोना संक्रमित जुयाच्वन धाःसा वयात अलग्ग तयाः मतदान याकेगु व्यवस्था यानातःगु दु ।

अथे हे थौंकन्हय् लकडाउनया कारणं यानाः आपालं मतदातात हेटौंडा तक वनेत तकं थाकुइगु खँ नं धाःगु दु । थुकी मतदान यायेत बागमती प्रदेशय् लाःगु १३ गू जिल्लाया सांसद, प्रदेश सभा सांसद लिसें स्थानीय तहया प्रमुख व उपप्रमुखत हेटौंडा थ्यंकेमाः ।

थ्वहे झ्वलय् एमालेया विवाद समाधान जुइगु सम्भावना खने दयेवं आः माधव नेपाल पुचःया समर्थन कयाः उम्मेदवारी बिउम्ह डा। खिमलाल देवकोटाया बारे छु यायेगु धइगु न्ह्यसः पिहां वःगु दु । एमालें आधिकारिक रुपं गृहमन्त्री रामबहादुर थापायात उम्मेदवार दयेकूगु दु ।

म्हिगः थापा माधव नेपालया छेँय् वनाः भोट फ्वनादीगु खः । तर नेता नेपालं बचं धाःसा बियामदीगु खँ सीदुगु दु । नेपाल पक्षया सांसद जीवनराम श्रेष्ठं धाःसा आः थापा हे थःपिनिगु नं उम्मेदवार जुइगु कारणं भोट थापायात हे बीमाः धकाः छगू अनलाइनयात बियादीगु अन्तर्वार्ताय् धयादीगु दु ।

सम्बन्धित बुखँ

LEAVE YOUR COMMENTS