शरणार्थी काण्डया वकालतय् नांजाःपिं वकिलत

येँ (नेपालभाषा टाइम्स)- नक्कली भुटानी शरणार्थी प्रकरणय् द्वपं लानाच्वंपिनिपाखें नेपाल बार एसोसिएसनया अध्यक्ष गोपालकृष्ण घिमिरे सहितया पुचलं वकालत याइगु जूगु दु । जिल्ला अदालत येँय् म्हिगःनिसें न्ह्याःगु थ्व सम्बन्धी थुनछेक वहसय् पुलांम्ह गृहमन्त्री बालकृष्ण खाँणया प्रतिरक्षाया निंतिं कांग्रेस समर्थित प्रजातान्त्रिक कानुन व्यवसायी संघं बहस यायेत तयारी याःगु खः । खाँणया पक्षय् पुलांम्ह महान्यायाधिवक्ता खम्मबहादुर खातीं नं बहस याइगु जूगु दु ।

खाँणया पक्षय् वरिष्ठ अधिवक्ता महादेश यादव, हरिहर दाहाल, प्रेमबहादुर खड्का, शेरबहादुर केसी, गोपालकृष्ण घिमिरे लगायत नीम्ह स्वयां अप्वः अधिवक्तातय्सं वकालतनामा फर्म भरे याःगु दु ।

उकथं ने नेकपा एमालेयात नेता लिसें पुलांम्ह उपप्रधानमन्त्री टोपबहादुर रायमाझीया पक्षं पुलांम्ह महान्यायाधिवक्ता लिसें वरिष्ठ अधिवक्ता रमेश बडाल नेतृत्वया कानुन व्यवसायीतय्सं बहस याइगु जूगु दु । उकथं हे गृहसचिव टेकनारायण पाण्डेया पक्षं पुलांम्ह न्यायाधिवक्ता रमण श्रेष्ठं बहस यायेत नां च्वकूगु दु ।

नक्कली भुटानी शरणार्थी प्रकरणय् सरकारी पक्षया नेतृत्व जिल्ला सरकारी वकिलया कार्यालय येँया प्रमुख लिसें सहन्यायाधिवक्ता अच्युतमणि न्यौपानें याइगु जूगु दु । थुगु मुद्दाया बहस यायेगु जिल्ला सरकारी वकिलया कार्यालय येँया अभियोगपत्र तयार यायेगु ज्याय् दुथ्याःपिं च्याम्ह सरकारी वकिलयात हे बिउगु दु ।

उकथं हे जाहेरी बिउपिंपाखे अधिवक्ता स्वागत नेपाल, सुशील शर्मा सापकोटा लगायतं बहस याइगु जूगु दु । छुं वरिष्ठ अधिवक्तातय्सं धाःसा थ्व मुद्दायात कयाः बहस मयाइगु जूगु दु । वरिष्ठ अधिवक्तापिं शम्भु थापा, चण्डेश्वर श्रेष्ठ, चन्द्रकान्त ज्ञवाली, टिकाराम भट्टराईपिंसं अभियुक्ततय् पक्षय् वहस यायेगु मखु धकाः न्हापा हे धायेधुंकूगु दु ।

थ्वहे झ्वलय् जिल्ला अदालत येँय् नक्कली भुटानी शरणार्थी प्रकरणय् द्वपं लानाच्वंपिंत कुनेगु, धरौटी फ्वनेगु वा सामान्य तारिखय् त्वःतेगु धइगु बारे वइगु जेठ ३१ गते जक आदेश बीगु जूगु दु ।