हाम्रो नेपाली पार्टीपाखें औपचारिक रुपं मुख्यमन्त्री दावी

येँ (नेपालभाषा टाइम्स)- बागमती प्रदेशय् माओवादी केन्द्रया सरकार अल्पमतय् लाःवंगु इलय् अन न्हूगु सरकार दयेकेत निर्णायक अवस्थाय् लानाच्वंगु हाम्रो नेपाली पार्टीं औपचारिक रुपं हे मुख्यमन्त्री दावी याःगु दु । पार्टीया प्रवक्ता ई. डिल्लिश्वोर कार्की (रोहनं) म्हिगः छगू प्रेस विज्ञप्ति जारी यासें वर्तमान अवस्थाय् हाम्रो नेपाली पार्टी छुं नं राजनीतिक दलया पक्ष वा विपक्षय् मवँसे प्रदेश सरकारया नेतृत्व यायेत तयार दुगु खँ धाःगु दु ।

बागमती प्रदेशय् हाम्रो नेपाली पार्टीया निम्ह सांसद दु । उकी मध्य् येँनं निर्वाचित सांसद शैलेन्द्र वज्राचार्य उगु पार्टीया संसदीय दलया नेता खः । सांसद वज्राचार्यं थ्व स्वयां न्ह्यः हे थः आः जुइगु सरकारय् मन्त्री जू वनेगु मखुसें थीथी दलतलिसे सहकार्य यानाः मुख्यमन्त्री हे जुइगु धकाः दावी यानादीधुंकूगु दु । आः वय्कःया पार्टीं नं उकियात स्वीकार यासें नीतिगत रुपं हे मुख्यमन्त्री पदया दावी याःगु खः ।

पार्टीपाखें पिकाःगु वक्तव्यय् वंगु आम निर्वाचनय् आपालं न्हूगु राजनीतिक दलतय्त जनतां त्याका हःगु खँ स्मरण यासें म्हिगः तक पुलांगु दल व पुलांपिं नेतातय्त ‘नो नट अगेन’ धकाः प्रचार याना जूपिं न्हूगु दलत नं आः वयाः वहे पुलांपिं नेतातय्त ब्वहलय् क्वबियाः सत्ताया चाकु सवाः फ्ययेत ब्वाँय् वनाच्वंगु खँ न्ह्यथनातःगु दु । बागमती प्रदेशय् नं सत्ताया चलखेल यानाच्वंपिं राजनीतिक दलतय्सं थःगु पार्टीयात नं मन्त्री पद व थीथी राजनीतिक नियुक्तिया ‘अफर’ याः वयाच्वंगु खँ न्ह्यथँसें वक्तव्यय् धयातःगु दु– म्हिगः नोट नट अगेन धकाः धया वयापिं नेतातय्त हे सत्ताय् छ्वयेगु लागिं ब्वह फयेत जिपिं तयार मदु बरु न्हूगु चरित्रया रुपय् बागमती प्रदेश सरकार क्वबीत जिपिं तयार दु ।’

बागमती प्रदेशय् दुगु ७ गू दलत मध्ये थौंकन्हय् एमाले, माओवादी व नेकपा (एस) या औपचारिक गठबन्धन जुइधुंकूगु दु । तर सरकार दयेकेत थुलि जक पार्टी जानाः मगाः । ११० सिट दुगु प्रदेशसभाय् सरकार दयेकेत ५६ सिट माः । तर थ्व स्वंगू दलयाके ५५ सिट जक दु । उकिं न्हूगु सरकार दयेकेगु लागिं हाम्रो नेपाली पार्टीया २ सिट मदयेक मगाः ।

सम्बन्धित बुखँ

LEAVE YOUR COMMENTS