नेपालं चाइनिज ताइपेइयात २–० गोलं बुकल

येँ–२०२२ या विश्वकप छनोट व २०२३ या एसियन कप छनोटया निंतिं बिहीवाः बहनी जूगु कासाय् नेपालं चाइनिज ताइपेइयात २–० गोलं बुकूगु दु । नेपाःया निंतिं अञ्जन विष्ट व नवयुव श्रेष्ठं छगू छगू गोल याःगु खः । कासाया न्हापांगु हाफय् विष्टं पेनाल्टिइ गोल याःगु खःसा निगूगु हाफय् श्रेष्ठं थप छगू गोल याःगु खः ।

कासाया स्वंगूगु मिनेटय् नेपाःया सन्तोष तामाङ थ्वाःगु फ्रिकिकय् ताइपेइया कासामिया बक्स दुने ह्याण्ड बल जुइवं नेपाःयात पेनाल्टिया ह्वःताः चूलाःगु खः । थ्व लिपा नेपालं गोल यायेत ७८ मिनेट पिइमाल । कासाया ८१ औं मिनेटय् श्रेष्ठं समन अर्यालया क्रसय् गोल याःगु खः ।

विश्वकप छनोट नेपालं आः मेगु कासा जोर्डन व अस्टे«ेलिया लिसे म्हिती । कुवेतय् जुयाच्वंगु छनोट कासाय् नेपाः वंगु मंगलवाः जूगु कासाय् इराक पाखें ६–२ गोलं बूगु खः । नेपाः दुथ्याःगु टिमय् अस्ट्रेलिया १२ अंक कयाः शीर्षस्थानय् दु । नेपाःया आः खुगू कासा लिपा ६ अंक दु । नेपाःया एसियन कप छनोटया स्वंगूगु चरणय् वनीगु सम्भावना अझं ल्यं दनिसा विश्वकप छनोटया समूह चरणय् नेपाः प्यंगूगु थासय् लाःगु दु ।