ने. सं. ११४६ पाेहेलागा द्वादशी - घ्यः चाकु संल्हु / ख्वपय् सम्यक

सितिकं वःगु गाडी तकं ठप्प

येँ (नेपालभाषा टाइम्स)- बुद्धया जन्मस्थल लुम्बिनीइ पर्यटक चाःहीकेगु लागिं धकाः विदेशं सितिकं छ्वया हःगु विद्युतीय गाडी तकं नेपालं चले मयासे वांछ्वया तःगु दु ।
लुम्बिनी लगायत बुद्धया जन्मस्थल तिलौराकोट, रामग्राम, देवदह आदि चाःहीकेगु लागिं धकाः एडीबीपाखें नेपाःयात च्यागः विद्युतीय गाडी व १४ गः भ्यान बियाहःगु खः ।

तर लुम्बिनी प्रदेशया यातायात व्यवस्था विभागं तुयूगु नम्बर प्लेटया थ्व गाडीयात वाउँगु प्लेटय् हीकेगु कानुनी व्यवस्था मदु धासें थुकियात चले यायेगु अनुमति मबिसे थाकातःगु दु ।

थ्व स्वयां न्ह्यः थ्व गाडी चले यायेत चार्जिङ स्टेशन हे मदु धकाः थाका तःगु खः । आः लुम्बिनीइ थुकिया लागिं चार्जिङ स्टेशन नं दयेकेधुंकूगु दु । चार्जिङ स्टेशन दयेकेधुंकाः आः नम्बर प्लेट हिलेगु कानुन मदु धासें सञ्चालन यायेगु अनुमति मबिसे थाकातःगु खः ।

कानुन मदुसां आःयात थ्व गाडी चले याकेगु व्यवस्था या धकाः लुम्बिनी प्रदेश सरकारं निर्णय यानाः यातायात व्यवस्था विभागयात निर्देशन नं बीधुंकूगु दु । तर विभागया कर्मचारीतयय्सं धाःसा कानुनी व्यवस्था मदयेक चले यायेगु पाय्छि जुइ मखु धकाः अनुमति मबिसे तयातःगु खँ सीदुगु दु । विभागया कर्मचारीतयय्सं सरकारया आदेश तकं पालना मयासे गाडी चले मयाकूगु खँय् धाःसा थीथी कथंया आशंका ब्वलनाच्वंगु दु ।

थ्व गाडी लुम्बिनी विकास कोष यात निःशुल्क वःगु जुयाः उकी छुं कथंया कमिशन नये मदुगुलिं यातायात व्यवस्था विभागया कर्मचारीतय्सं थथे आलटाल याःगु आशंका जूगु दु । अनया छुं कर्मचारीतय्सं कमिशन नये मखंगु जुयाः हे थ्व गाडी दर्ता मयाकूगु आशंका प्रदेश सरकारं हे यानाच्वंगु खँ सीदुगु दु ।

लुम्बिनी लागाय् पर्यावरणय् लिच्वः मलाइ कथंया गाडी चले यायेमाः धकाः एडीबीं अनुदानय् थ्व गाडी बिउगु खः । करिब १३ करोड बराबरया थ्व गाडी एडीबीं वंगु स्वदँ न्ह्यः कोषयात बिउगु खःसां विभागया कर्मचारीतय्सं दर्ता मयासे तयातःगु खः । थ्व गाडीपाखें नं लुम्बिनीइ पर्यटन विकासय् तिबः जुइगु आशा यानातःगु दु ।