आः फोहोर यंकेत समस्या मजुइगु

येँ(नेपालभाषा टाइम्स)- बर्खाया ई । उकिसनं वा वइगु मौसम अले फोहोरया समस्या । बर्खां वा वइगु इलय् स्वनिगःया फोहर व्यवस्थापनय् समस्या जुइगु न्हूगु खँ मखु ।
बर्खालिसें वा वइगु इलय् स्वनिगःया फोहर अन्तिम व्यवस्थापन याइगु ल्याण्डफिल साइट वनेगु लँ स्यनाः फोहोर व्यवस्थापन यायेत तसकं समस्या जुइगु । गुकिं यानाः वा वइगु इलय् स्वनिगःया सतक, चुक, ननि, दुवाः आदि थासय् तःन्हुतक फोहोर मुनाच्वनीगु व निभाः त्वइगु इलय् नवइगु नापं अनेकथंया ल्वचं कइगु ग्याःचिकु दयाच्वनीगु खः ।

आः उकथंया समस्या मजुइगु जूगु दु । आः बर्खाया इलय् वा वःसां ल्याण्डफिल साइट वनेगु लँया हे कारणं फोहर अन्तिम व्यवस्थापन यायेत न्हापा लिपा थें समस्या मजुइगु जूगु दु । छुं दँ न्ह्यःतक नं स्वनिगःया फोहर अन्तिम व्यवस्थापन याना वयाच्वंगु सिसडोल व लिपांगु इलय् फोहर व्यवस्थापन याना वयाच्वंगु बञ्चरेडाँडास्थित ल्याण्डफिल साइटतक वा वयाः लँ स्यनीगुलिं फोहोर व्यवस्थापनय् समस्या जुयाच्वनीगु खः । आः बर्खाया इलय् बञ्चरेडाँडा फोहोर प्रशोधन केन्द्रतक फोहर यंकेगु ज्या रोके मजुइगु जूगु दु ।

सरकारं छुं ई न्ह्यः द्रुत मार्ग (फास्ट ट्रयाक)पाखें ठेक्का बियाः फोहर अन्तिम व्यवस्थापन यायेत प्रयोग जुइगु सतक निर्माण याःगु दु । न्हापा ठेक्का काःगु निर्माण कम्पनीलिसेया ठेक्का सम्झौता त्वाःदलेवं न्हूगु निर्माण कम्पनीलिसे सम्झौता यानाः ज्या न्ह्याकेबलय् अप्वः ई काइगु जुइवं ‘फास्ट ट्रयाक’पाखें ठेक्का बियाः निर्माणया ज्या न्ह्याकूगु खः । मन्त्रिपरिषदं निर्णय याःगु प्यलाया दुने ज्या सिधयेकागु बालाजु–त्रिशुली–छहरे–विदुर सडक आयोजनाया इन्जिनियर सागर भण्डारीं कनादीगु दु ।

सडक विभागं थनिं छगू दशक न्ह्यः बालाजु–रानीपौवा सतक निर्माणया ठेक्का सैलुङ कन्स्ट्रक्सनयात बिउगु खः । निर्माण कम्पनीं क्वःछिनातःगु इलय् ज्या सिमधयेकेवं तःक्वः तःक्वः म्याद थप यानां नं ज्या सिमधयेकूगुलिं वंगु असारय् ठेक्का सम्झौता हे रद्द यानाः न्हूगु सम्झौता याःगु खः । असोज २६ गते न्हूगु ठेक्का सम्झौता यानाः २८ गतेनिसें ज्या शुरु यानागु इन्जिनियर भण्डारीं कनादिल ।

बर्खां वा वयाः सतक दुसुना वनीगु व फोहोर ज्वनावःगु गाडी न्ह्याःवने मफयाः लँ दथुइ हे थानाच्वनीगु नापं थीथी कारणं सतक अवरुद्ध जुइगु यानाः अनेक समस्या जुयाच्वंगु खः । थगुने बर्खाया इलय् लां लां तक नं फोहोर व्यवस्थापन यायेगु ज्या मजुइवं सरकारं उगु सतक याकनं निर्माण यायेगु खँय् चिउताः क्यंगु खः ।