
येँ -येँ महानगरपालिकां महानगर अन्तर्गत लाःगु स्कूलय् लागू याःगु स्थानीय पाठ्यक्रम नेपालभाषां ब्वंकेगु खँय् राष्ट्रपति व तत्कालीन प्रधानमन्त्रीया तकं समर्थन दुगु खँ पिहां वःगु दु ।
बागमती प्रदेशया आन्तरिक मामिला तथा कानून मन्त्रीइ नियुक्त जुयादीम्ह डा. अजय क्रान्ति शाक्ययात भिंतुना देछायेगु निंतिं बुधवाः जूगु ज्याझ्वलय् न्ववानादिसें येँ महानगरपालिकाया मेयर विद्यासुन्दर शाक्यं थ्व खँ कनादीगु खः । मेयर शाक्यं येँ महानगर–पालिका अन्तर्गतया स्कूलय् नेपालभाषां ब्वंकेगु निंतिं राष्ट्रपति विद्यादेवी भण्डारी व तत्कालीन प्रधानमन्त्री केपी शर्मा ओलीलिसे थम्हं सल्लाह यानागु व वय्कःपिंसं थुकी समर्थन प्वंकादीगु खँ धयादीगु खः ।
‘विदेश वनाः ब्वं वनेबलय् दकलय् न्हापां अनयागु भाय् निं सयेकेमाः, अथे येँय् वयाः ब्वं वइपिंसं नं थनया संस्कृति, थनया रहनसहन थुइकेगु खःसा थनया भाय् नं सयेकेमाः, उकिं स्वनिगलय् च्वनाः ब्वनीपिंसं थनया मू भाय् सयेकेमाः । जिं राष्ट्रपति व प्रधानमन्त्रीया न्ह्यःने थ्व हे खँ तयाः वय्कःपिंत कन्भिस याना,’ मेयर शाक्यं धयादीगु दु ।
मेयर शाक्यं आः स्थानीय पाठ्यक्रम लागू जुइधुंकूगुलिं थुकियात सुनां चिइके मफइगु खँ नं धयादीगु दु । ‘थन यक्वसित छु भ्रम जुयाच्वंगु दु कि जिपिं मदयेधुंकाः नेपालभाषां ब्वंकेगु लागू जुइमखु । जिपिं दत्तले हे जक खः धकाः धयाच्वंपिं दु, तर अथे मखु, आः छक्वः लागू जुइधुंकाः थ्वयात सुनां नं लिकाये फइ मखु । यदि सुनां लिकायेगु कुतः यात धाःसा झी सकलें जानाः विरोध यात धाःसा सुनां नं थी फइ मखु ।’
नेवाः पत्रकार राष्ट्रिय दबूया ग्वसालय् जूगु भिंतुना देछायेगु ज्याझ्वलय् न्ववानादिसें बागमती प्रदेशया आन्तरिक मामिला मन्त्री शाक्यं थःपिं भाषा आन्दोलनया जगय् हे थन तक थ्यंगु खः धासें धयादिल, ‘जिमि हिइ हे झीगु भाय्, संस्कृति, सम्पदा दु, उकिं जिमिसं भाय्, संस्कृति सम्पदा स्यंकेगु ज्या याइ धकाः छुं शंका यायेमाःगु आवश्यक मदु । जातीय म्हसीका, संस्कृति, सम्पदा संरक्षणया निंतिं छु तक यायेफु, व ज्या जिमिसं याये ।’
LEAVE YOUR COMMENTS