ख्वपया निम्ह पत्रकारयात पुरस्कार

ख्वप (नेपालभाषा टाइम्स) – ख्वपयात कर्मथलो दयेकाः व्यावसायिक रुपं पत्रकारिता याना वयाच्वंपिं निम्ह पत्रकारयात सिरपाः लःल्हासे सम्मान याःगु दु। नेपाल पत्रकार महासंघ ख्वप शाखाया नीनिक्वःगु तःमुँज्याया झ्वलय् वरिष्ठ पत्रकार कविर राणा व राष्ट्रिय समाचार समिति (रासस)या फोटो पत्रकार रत्नकृष्ण श्रेष्ठयात पत्रकारिता पुरस्कार लःल्हाःगु खः ।

नेपाल पत्रकार महासंघया पुलांम्ह अध्यक्षलिसें वरिष्ठ पत्रकार हरिहर विरहीं राणायात झिद्वः तका दांया भगवान महर्जन स्मृति पत्रकारिता पुरस्कार व श्रेष्ठयात निद्वः व स्वसः तका दांया मैंयादेवी स्मृति पत्रकारिता पुरस्कार लःल्हानादीगु खः ।

ज्याझ्वलय् नवासें वरिष्ठ पत्रकार विरहीं जनअधिकार व लोकतन्त्र स्थापनाया निंतिं दत्तचित्त जुयाः लगे जूपिं पत्रकारतय्त हनेगु ज्या यायेमाः धासें सरकारं लोकतन्त्र, प्रेस स्वतन्त्रता व अभिव्यक्ति स्वतन्त्रा धरापय् लाकेत स्वयाच्वंगु व उकियात खबरदारी पत्रकारतय्सं यायेमाः धयादि । महासंघया उपाध्यक्ष दिलिप थापामगरं संविधानया प्रस्तावनाय् हे ग्यारेन्टी यानातःगु प्रेस व अभिव्यक्ति स्वतन्त्रतायत कुण्ठित यायेगु स्वत धाःसा मान्य जुइमखु धयादिल ।

महासंघया महासचिव रमेश विष्टं महासंघं संस्थागत हित व पत्रकारतय् हकहितया निंतिं सक्रियतापूर्वक भूमिका म्हिताच्वंगु दु धयादिल । ख्वप शाखाया अध्यक्ष पुष्कर बुढाथोकीया सभापतित्वय् जूगु ज्याझ्वलय् पुरस्कृत व्यक्तित्वया म्हसीका रोशन शिल्पकारं बियादीगु खःसा पुरस्कृत व्यक्तित्व राणा, पत्रकार महासंघया केन्द्रीय दुजःपिं लक्ष्मण कार्की, गोविन्द चौलागाइँ, उपत्यका प्रदेश महासचिव श्रीजन झा, यल शाखाया अध्यक्ष ज्ञानप्रसाद पौडेल लगायतं भिंतुना न्वचु बियादीगु खः ।

तःमुँज्याया बन्द सत्रय् शाखाया सचिव कृष्णप्रसाद नेपालं प्रगति प्रतिवेदन व कोषाध्यक्ष मोहन बल्लं आर्थिक प्रतिवेदन न्ह्यब्वयादीगु खः ।

सम्बन्धित बुखँ

LEAVE YOUR COMMENTS