ने. सं. ११४४ कौलाथ्व पारू - नःलास्वनेगु

किपा च्वज्या कासाय् ताःलाःपिंत सिरपाः

येँ (नेपालभाषा टाइम्स)- जगतसुन्दर परियत्ति केन्द्रया ग्वसालय् जूगु स्वनिगःव्यापी अन्तर विद्यालयस्तरीय किपा च्वज्या कासाय् ताःलाःपिंत सिरपाः लःल्हाःगु दु । केन्द्रया ग्वसालय् बुद्ध संवत् २५६७ क्वःगु स्वांयाःपुन्हिया लसताय् जूगु किपा च्वज्या कासाय् ताःलाःपिंत जगतसुन्दर ब्वनेकुथिइ जूगु ज्याझ्वलय् सिरपाः लःल्हाःगु खः ।

परियत्ति केन्द्रया केन्द्राध्यक्ष, जगतसुन्दर ब्वनेकुथिया संस्थापकलिसें पुलांम्ह प्रिन्सिपल माया मानन्धरया सभापतित्वय् जूगु ज्याझ्वलय् नांजाःम्ह समाजसेवीलिसें बौद्ध व्यक्तित्व मोतिलाल शिल्पकार मूपाहांकथं झायादीगु खः ।

ज्याझ्वलय् पाहांकथं ब्वनेकुथि संचालक समिति नायः डा. चुन्दा वज्राचार्य, ब्वनेकुथि संचालक समितिया दुजःलिसें परियत्ति केन्द्रया नायः राजभाई जकःमि, परियत्ति केन्द्रया सल्लाहकार डा. त्रिरत्न मानन्धर, ब्वनेकुथिया संस्थापक अनाररत्न वज्राचार्य, युवा बौद्ध समूहया नायः मदन तुलाधर, नेपालमण्डलव्यापी वक्तृत्व कला पर्व मूगुथिया न्वकु रविन्द्र शाक्य झायादीगु खः ।

तगिं ५, ६ व ७, तगिं ८, ९ व १० यानाः निगू पुचलय् जूगु किपा च्वज्या कासाय् न्हापांगु पुचःपाखे सुदिक्क्षा चौधरी (जेपी हाईस्कुल, ७) न्हाप, निराजन श्रेष्ठ (नेपाल आदर्श,६) लिउ, रुबेक शाक्य (टे«डिशनल आर्ट ट्रेनि· सेन्टर, ६) लियांलिउ व प्रिया पौडेल (ज्ञानोदय से.स्कुल ७) हःपाः लाःगु खः ।

अथे हे निगूगु पुचःया कासाय् मल्लिका लु·ेली मगर (संस्कृत दरवार हाई स्कुल, १०), इभा राजभण्डारी (नेवाः स्यनेकुथि स्कुल ९), मनिष धामी (महांकाल सेकेन्डरी स्कुल, ८), सिद्धार्थ महर्जन (ट्रेडिशनल आर्ट ट्रेनि· सेन्टर, ८) छसिकथं न्हाप, लिउ, लियांलिउ व हःपाः त्याकेत ताःलाःगु खः ।

किपा च्वज्या कासाय् निर्णायककथं उत्तम भन्ते (यल), वरिष्ठ कलाकार पूर्णरत्न वज्राचार्य (येँ) व वरिष्ठ पौभाः च्वमि माइला दो· (ख्वप) च्वनादीगु खः ।

किपा च्वज्या कासाय् विजयी जुयादीपिंत मूपाहांलिसें पाहांकथं झायादीपिं थीथी व्यक्तिपिंसं दसिपौ, चैत्य, चीभाः, बुद्धमूर्ति, सफू, तिथिम्हिचा पौ व पदक लःल्हानादीगु खःसा ब्वति काःपिं सकलें विद्यार्थीपिंत स्केच बुक व दसिपौ लःल्हाःगु खः ।

नेपालमण्डलव्यापी वक्तृत्व कला पर्व मूगुथिया विशेष ग्वाहालिइ उगु किपा च्वज्या कासा जूगु खः । ज्याझ्वलय् निर्णायकमण्डलया दुजःपिंत मूपाहां शिल्पकारं मतिनाया चिं लःल्हानादीगु खःसा मूपाहांयात केन्द्राध्यक्ष मानन्धरं लुमन्ति चिं लःल्हानादीगु खः ।

निर्णायकमण्डलया दुजः पूर्णरत्न वज्राचार्यं लिच्वः न्यंकादीगु ज्याझ्वलय् केन्द्रया सल्लाहकार डा. मानन्धर, मूगुथिया न्वकु शाक्य व मूपाहां शिल्पकारं नुगःखँ तयादीगु खः । केन्द्रया नायः जकःमिं लसकुस यानादीगु ज्याझ्वलय् ब्वनेकुथिया गुंगू तगिंया ब्वनामि फिदा खातुनं कुमारि चचा प्याखं न्ह्यब्वयादीगु खः ।