कोटेश्वर–कलंकी चक्रपथय् खुगू आकाशे ताँ निर्माण याइगु

येँ – चीन सरकारया ग्वाहालिं दयेकूगु कोटेश्वर–कलंकी सतकखण्डय् आकाशे ताँ निर्माण याइगु जूगु दु । उगु थासय् आकाशे ताँ मदुगुलिं लँजुवाःतय्त समस्या जूगु व लँ दथुं लँ त्वाःल्हायेबलय् दुर्घटनाया सम्भावना अप्वःगुलिं आः उगु सतकखण्डय् ताँ निर्माण यायेत्यंगु खः ।
सतक दयेकूगु इलय् हे चिनिया निर्माण कम्पनीं स्वंगू थासय् आकाशे ताँ दयेकूगु खःसां व पर्याप्त मजूगुलिं आः नेपाल सकारं थप खुगू थासय् आकाशे ताँ दयेकेत्यंगु खः ।

वइगु असार मसान्त तकया दुने आकाशे ताँ दयेके क्वचायेकेगु लक्ष्यलिसें ज्या जुयाच्वंगु दु । काठमाडौं चक्रपथ सुधार योजनां बिउगु जानकारीकथं चिनिया निर्माण कम्पनीं कोटेश्वर, बागडोल व ग्वार्कोय् यानाः स्वंगू थासय् आकाशे ताँ दयेकूगु खःसा आः सातदोबाटो, एकान्तकुना, बालकुमारि, महालक्ष्मीस्थान, सानेपा व बल्खुइ सडक विभागं आकाशे ताँ निर्माण यायेत्यंगु खः ।

नेपालं निर्माण यायेत्यंगु आकाशे ताँमध्ये न्यागू थाय्या ठेक्का सम्झौता जुृयाः नं ज्या जुयाच्वंगु जानकारी योजनां बिउगु दु । १० किमी ताःहाकःगु सतकखण्डय् आः थप जुइगु आकाशे ताँया निर्माण सिधयेवं चक्रपथया थुगु सतकखण्डया दक्वं धइथें मू मू चोकय् आकाशे ताँ दइगु जूगु दु ।

 

सम्बन्धित बुखँ

LEAVE YOUR COMMENTS