फास्ट ट्राय्कया ताँ दयेकेत टेण्डर

येँ – नेपाली सेनां फास्ट ट्राय्कया ताँ दयेकेगु निंतिं खुगू कम्पनीयात प्रारम्भिक छनोट याःगु दु । फास्ट ट्राय्क दयेकेगु झ्वलय् लँय् गुइगुपु ताँ दयेकेमाः । उकी मध्ये खुइनिपु तजाःगु ताँया निंतिं सेनां इपिसिएफ मोडलय् ज्या यायेगु कथं अन्तर्राष्ट्रिय टेन्डर आह्वान याःगु खः । उकी आवेदन बिउपिं मध्ये खुगू कम्पनी प्रारम्भिक छनोटय् लाःगु खँ प्रवक्ता गोकुल भण्डारीं कनादिल ।

छनोटय् लाःगु खुगू कम्पनी मध्ये न्यागू कम्पनी चिनियाँ खःसा छगू टर्किस कम्पनी जूगु खँ सेनां धाःगु दु । सेनां फास्ट ट्राय्कया डीपीआर दयेकेगु निंतिं धाःसा कोरियाली कम्पनी सुसुङयात जिम्मेवारी बीधुंकूगु दु । सुसुङं स्वलाया दुने डीपीआर दयेकेगु ज्या क्वचायेकेगु खँ धाःगु दु ।

सेनां ताँ व सुरुङ खण्ड बाहेकया डीपीआर दयेकेगु जिम्मेवारी सुसुङयात बिउगु खः । सुसुङ १० करोड १५ लाख तकां डीपीआर दयेकीगु खँ धाःगु दु । एसियाली विकास बैंकं सन् २००८ स याःगु अध्ययन व नेपाली सेनां याःगु विस्तृत इन्जिनीयरिङ सर्भेया आधारय् डीपीआर दयेकीगु खँ धाःगु दु ।