किपुली निम्ह मिसामस्तय्त कुनाः बलात्कार

येँ –  १३ व १४ दँ दुपिं निम्ह मिसा मस्तय्त बन्धक दयेकाः बलात्कार याःगु द्वपनय् किपुली छम्हेसित ज्वंगु दु । ज्वंम्ह मनू कैलालीइ स्थायी छेँ जुयाः थौंकन्हय् किपुली च्वनाच्वंम्ह २५ दँया हेम खत्री खः । खत्रीयात महानगरीय प्रहरी वृत्त किपुलिं नियन्त्रणय् काःगु खः । खत्रीयात ज्वनाःलि वया लिसें तुं दुम्ह छम्ह मिसा मचाया उद्धार नं याःगु दु ।

घटना विवरण ः
प्यन्हु न्ह्यः निम्ह मिसामस्त इमाडोलय् च्वंगु थःगु क्वथाय् तताम्हलिसे तंचायाः पिहां वंगु जुयाच्वन । उपिं निम्ह बानेश्वरया खरिबोटय् कुहां वयेगु धकाः गाडीइ च्वना वन । तर बबरमहल थ्यनेवं बसय् थःपिं नापं तुं फ्यतुनाच्वंम्ह छम्ह ल्याय्म्हयात न्यंबलय् बानेश्वरं रत्नपार्क वनेत अःपुइगु खँ धाल । उकथं हे उम्ह ल्याय्म्हनापं तुं उपिं रत्नपार्क थ्यन ।

रत्नपार्क थ्यनेधुंकाः ल्याय्म्हं ‘आः खिउँसे नं च्वन, छिपिं निम्हं जिनापं तुं किपुली जिगु क्वथाय् नु’ धकाः ह्ययेकल । मिसामस्त नं ल्याय्म्हया धापू माने यानाः वया नापं तुं किपुली वन । वयां लिपा भदौ २३ गते तक उम्ह ल्याय्म्हं थ्व निम्हं मिसामस्तय्त थःगु हे क्वथाय् कुनाः लगातार बलात्कार यायेगु ज्या यात ।

थ्वहे दथुइ भदौ २३ गते कुन्हु १४ दँ दुम्ह मिसामचां उम्ह हे ल्याय्म्हया मोबाइलं थःथितियात फोन यात । मिसा मचां थःथितियात फोन यायेवं उम्ह मिसा मचायात ल्याय्म्हं बल्खुइ यंकाः इमाडोलया गाडीइ तयाः छ्वया बिल । झिंस्वदँ दुम्ह मेम्ह मिसामचायात धाःसा थःलिसें तुं तया तल ।झिंप्यदँ दुम्ह मिसामचा छेँय् थ्यनेवं घटना बारे छेँजःपिंत जानकारी बिल ।

वयां तत्काल लिपा प्रहरीइ उजुरी नं तल । उजुरी लायेवं प्रहरी मिसामचालिसें तुं घटनास्थलय् थ्यन । अन उमिसं मेम्ह मिसामचाया उद्धार यायेगुया नापनापं पीडक मिजंयात नं नियन्त्रणय् काल । ज्वंम्ह खत्रीयात प्रहरीं अपहरण लिसें शरीर बन्धक व जबर्जस्ती बलात्कार याःगु अभियोगय् मद्दा दर्ता यानाः अनुसन्धान न्ह्याकूगु खँ महानगरीय प्रहरी परिसर येँनं धाःगु दु ।

सम्बन्धित बुखँ

LEAVE YOUR COMMENTS