खुलामञ्चय् फुटबल ग्राउण्ड मदयेकेत इनाप

येँ (नेपालभाषा टाइम्स)÷येँया खुलामञ्चयात फुटबल म्हितेगु मैदान दयेकेगु निर्णय लित कायेत मुक्त टुडिखेल अभियानं ध्यानाकर्षण याःगु दु । येँ महानगरपालिकां खुलामञ्चयात फुटबल मैदान दयेकेगु प्रक्रिया न्ह्याकेवं मुक्त टुँडिखेल अभियानं उकियात कार्यान्वयन मयायेत इनाप याःगु खः ।

खुला सार्वजनिक जग्गाया सरकारीकरण यायेगु दुषित मनसायया लिसें येँ मनपां खुलामञ्चय् निगू फुटबल मैदान दयेकेत प्रस्ताव याःगु खँ अभियानं विज्ञप्तिइ न्ह्यथनातःगु दु । खुलामञ्च दुगु क्षेत्र दैवी प्रकोपया इलय् आश्रय केन्द्रया रुपय् दुगु व न्हिथं न्हना वनाच्वंगु खँ नं अभियानं धाःगु दु ।

सन् १९६२ स ५२ प्रतिशत सार्वजनिक खुला क्षेत्र दुगु तिंख्यःया भूभाग सन् १९९० य् ३३ प्रतिशतय् कुहां वःगु व सन् २००० य् २५ प्रतिशतय् थ्यनाः सन् २०१७ तक थ्यंबलय् १४ प्रतिशतय् लिकुंगु खँ नं अभियानं धाःगु दु ।

अभियानं खुलामञ्चया थःगु हे सांस्कृतिक, ऐतिहासिक व प्राकृतिक महत्व दुगु खँ न्ह्यथँसें विज्ञप्तिइ धयातःगु दु, ‘खुलामञ्च ऐतिहासिक क्षेत्र खःसा लोकतान्त्रिक गणतन्त्र नेपाः दयेकेगु निंतिं महत्वपूर्ण क्षेत्र नं खः, थन फुटबल मैदान दयेकल धाःसा मेगु ज्या मजुइगु निश्चित दु ।’

न्हापा पार्किङया थाय् दयेकातःगु खुल्लामञ्च लागायात अभियन्तातय्सं हे खुल्ला याकेगु बिउगु खःसा अनं लिपा पसःक्वः पिकायेगु कुतः जूगु खः । लिपा अन अण्डरग्राउण्ड पार्किङ दयेकेगु प्रस्ताव न्ह्यःने वःगु खःसा उकियात नं अभियन्ता लगायत स्थानीय जनतां विरोध याःगु खः ।