नेपाल–कोरियामैत्री अस्पतालय् रेडियोलोजी ब्लक

थिमि – नेपाल–कोरियामैत्री अस्पतालया रेडियोलोजी ब्लक निर्माणया निंतिं शिलान्यास याःगु दु । मध्यपुर थिमि नगरपालिकां संचालन यानाच्वंगु अस्पतालया रेडियोलोजी ब्लक संविधान दिवसया लसताय् लाकाः नगरपालिकाया प्रमुख मदनसुन्दर श्रेष्ठं शिलान्यास यानादीगु खः ।

अथे हे अस्पतालं सहुलियत भावं वासः मीगु निंतिं फार्मेसी नं संचालनय् हःगु दु । रेडियोलोजी ब्लकया शिलान्यास यानादिसें नगरप्रमुख श्रेष्ठं आम नागरिकया स्वास्थ्यय् सहज पहुँचयात अभिवृद्धि यायेगु उद्देश्यं सेवा विस्तार यायेगु झ्वलय् रेडियालोजी ब्लक निर्माण यायेत्यंगु खः धयादिल ।

अस्पताल परिसरय् थ्व स्वयां न्ह्यः निसान फार्मेसीया नामं पसः कवः बालं कयाः वासः पसः संचालन जुया वयाच्वंगु खःसा आः अस्पतालं हे सहुलियत भावं वासः विक्री यायेगु सेवा नं संचालनय् हःगु दु । नगर प्रमुख श्रेष्ठं अस्पतालं संचालनय् हःगु फार्मेसीया नं उलेज्या यानादीगु खः ।

थ्व हे झ्वलय् अस्पतालं आधुनिक सुविधासहितया एम्बुलेन्स व सिटिस्क्यान मेसिन नं हयेत्यनागु व उकिया निंतिं प्रक्रिया तकं न्ह्यायेधुंकूगु नगरप्रमुख श्रेष्ठं कनादिल । उगु अस्पतालं नगरपालिकाया ८० प्रतिशत स्वयां अप्वः नगरवासीतय्त स्वास्थ्य बीमा ज्याझ्वलय् सहभागि याकाः शतप्रतिशत निःशुल्क उपचार यायेगु व्यवस्था याना वयाच्वंगु दु ।