नेपालं नं नक्सा पित बीत निर्देशन

सीमा विवाद अन्तर्राष्ट्रिकरण याये मजिउ ः दाहाल

येँ – नेपाः–भारत सीमा विवादयात अन्तर्राष्ट्रिय–करण याये मजिउगु बिचाः पुलांम्ह प्रधानमन्त्री लिसें सत्तारुढ दल नेकपाया अध्यक्ष पुष्पकमल दाहालं तयादीगु दु । संसदया राज्य व्यवस्था समितिइ न्ववायेगु झ्वलय् वय्कलं उगु खँ धयादीगु खः । वय्कलं सीमा विवादयात अन्तर्राष्ट्रियकरण यानाः समस्या ज्यनी मखु धासें आपसी वार्ता व संवादं हे समस्या ज्यंकेमाःगु खँ धयादीगु खः ।

सीमा विवादयात उत्तेजित दयेके मजिउ धासें वय्कलं राजनीतिक व कुटनीतिक रुपं समस्या ज्यंकेमाःगु खँय् बः बियादीगु दु । थ्वहे झ्वलय् संसदया राज्य व्यवस्था समितिया बैठकं लिम्पियाधुरा, लिपुलेक व कालापानी क्षेत्रयात कःघानाः नेपाःया थःगु हे नक्सा सार्वजनिक यायेत नं सरकारयात निर्देशन बिउगु दु ।

नेपालं औपचारिक रुपं छ्यला वयाच्वंगु नक्सा त्रुटिपूर्ण जूगु लिसें लिम्पियाधुरा मुहान हे महाकाली खुसिया मू मुहान जूगुलिं उकियात प्रस्ट जुइक नेपाःया नक्सा सार्वजनक यायेत सरकारयात निर्देशन बिउगु खः ।

नेपालं छ्यला वयाच्वंगु निशान छापय् प्रयोग जूगु नक्साय् तकं लिम्पियाधुरा, लिपुलेक व कालापानी मदुगु खँ सार्वजनिक जुइवं समितिं फुक्क भूभाग कःघानाः न्हूगु नक्सा सार्वजनिक यायेत निर्देशन बिउगु खः । समितिया दुजः नवराज सिलवालं निशान छापय् छ्यःगु नेपाःया नक्साय् लिम्पियाधुरा, लिपुलेक व कालापानी मदुगु खँ धायेवं समितिया दुजःपिं हे अजू चाःगु खः ।

लिसें समितिं भारतीय अतिक्रमण–यात पनेगु नितिं सीमा सुरक्षा बलया स्थायी क्याम्प तयेत नं सरकारयात निर्देशन बिउगु दु । सीमा क्षेत्रय् थःगु बल्लाःगु उपस्थिति दयेमाः धासें उकियात ध्यान बीत नं समितिं निर्देशन बिउगु दु । समितिं म्हिगः सीमा विवादयात कयाः सहलह यायेगु निंतिं प्रधानमन्त्री केपी शर्मा ओली लिसें गृहमन्त्री रामबहादुर थापा बादलयात सःतूगु खः ।

तर प्रम ओलीं थः उपस्थित जुइ मफइगु खँ धासें भूमि व्यवस्था तथा सहकारी मन्त्री पद्मा अर्यालयात समितिइ छ्वयाहःगु खः । थ्वहे झ्वलय् अखिल नेपाल महिला संघं (अनेम संघं) परराष्ट्र मन्त्री प्रदीपकुमार ज्ञवालीयात कालापानी, लिपुलेक व लिम्पियाधुरा थःगु भूभाग दुने लाकाः भारतं सार्वजनिक याःगु नक्सायात कयाः ज्ञापनपौ लःल्हाःगु दु ।