
येँ – मेलम्ची खानेपानी आयोजना पूवंकेगु निंतिं नेपाः सरकार अलमल जुयाच्वंसां आयोजनाया निंतिं त्यासा बिउगु एसियाली विकास बैंक (एडीबीं) धाःसा आयोजना क्वचायेकेगु निंतिं योजना तयार याःगु खँ सीदुगु दु । एडीबीं आयोजना क्वचायेकेगु निंतिं थीथी झिगू प्याकेजय् स्वदेशी निर्माण व्यवसायीपाखें हे ज्या याकेफइगु सुझाव सहितया प्रतिवेदन सरकारयात बिउगु दु ।
एडीबीं अर्थ मन्त्रालय मार्फत थ्व योजना सरकारयात लःल्हाःगु खः । अथेहे परामर्शदाता कम्पनी इप्टिसां नं मेलम्ची आयोजनाया ल्यं दनिगु ज्या क्वचायेकेगु निंतिं विस्तृत योजना सरकारयात बिउगु खँ सीदुगु दु । दाता व परामर्शदातापिंसं आयोजना क्वचायेकेगु निंतिं थःपिनिगु प्रतिवेदन बिउसां नं मेलम्ची खानेपानी विकास समितिं धाःसा आःतक छुं नं कथंया योजना तयार याःगु मदुनि । आयोजनां धाःसा थःपिं अध्ययन यानाच्वनागु खँ जक धायेगु यानाच्वंगु दु ।
मेलम्चीया ठेकेदार कम्पनी सीएमसीं वंगु मंसिर २९ गते यकःति रुपं ठेक्का त्वाःथलागु पौ सरकारयात बिउगु खः । ठेक्का त्वाःथलागु पौ वयेवं सरकारं ज्या त्वःताः बिसिउँ वनेत्यंगु धासें ठेकदार कम्पनीया कर्मचारीतय्त नियन्त्रणय् काःगु खः । तर उपिं ज्याय् लिहां वयेगु धकाः थःगु देय् इटाली लिहां वंगु खः । थ्वयां लिपा सरकारं सीएमसीयात झिंप्यन्हुया दुने ज्याय् लिहां वयेगु खः कि मखु धयागु पौ च्वयाः छ्वःगु खःसां उकिया लिसः मवयेवं माघ २४ गते सरकारं ठेक्का त्वाःथलेगु निर्णय याःगु खः ।
मेखे मेलम्ची आयोजना क्वचायेकेगु बारे खानेपानी मन्त्री विना मगर व मन्त्रालयया कर्मचारी दथुइ विवाद ब्वलनाः नं आयोजना अलपत्रय् लाः वनाच्वंगु दु । मन्त्री मगर सीएसीयात हे लित हयेगु पक्षय् दुसा कर्मचारीत धाःसा गुगुं नं हालतय् सीएमसीयात लित महयेगु पक्षय् दुगुलिं आयोजना छु जुइ धइगु अन्योलय् लानाच्वंगु दु ।
LEAVE YOUR COMMENTS