गणेशदेवी प्रतिष्ठानपाखें स्वम्हेसित हना

येँ(नेपालभाषा टाइम्स)- गणेशदेवी मानन्धर स्मृति प्रतिष्ठानं गायन, संगीत व पत्रकारिता ख्यलय् योगदान बियादीपिं स्वम्हेसित हनेज्या याःगु दु । प्रतिष्ठानं शनिवाः थनया मरुहिति ब्यांक्वेटय् जूगु ज्याझ्वलय् गायनपाखे वरिष्ठ म्येँ हालामि जनगायक भृगृराम श्रेष्ठ, पत्रकारिपाखे सिनेपत्रकार विजयरत्न असंबरे व गायनपाखे न्हू प्रतिभा सिद्धार्थ वज्राचार्ययात हनेज्या याःगु खः ।

प्रतिष्ठानया नायः विजयकुमार मानन्धरया सभापतित्वय् जूगु ज्याझ्वलय् जनगायक श्रेष्ठयात नीन्याद्वः तका दांलिसें दीर्घ सेवा सम्मान, असंबरेयात झिंन्याद्वः तका लिसें हनापौ व वज्राचार्ययात न्याद्वः तका दांलिसें प्रतिभा सिरपाः लःल्हाःगु खः ।

वय्कःपिंत वरिष्ठ शिक्षाविद्लिसें साहित्यकार हितकरवीर सिंह कसाः, बागमति प्रदेशया सांसद शैलेन्द्रमान वज्राचार्य व नेवाः देय् दबूया नायः पवित्र वज्राचार्यं दोसल्ला, हनापौ व दां लःल्हासे सम्मान यानादीगु खः ।

सांगीतिक ज्याझ्वः नं न्ह्यब्वःगु ज्याझ्वलय् सम्मानित वरिष्ठ म्येँ हालामि जनगायक भृगुराम श्रेष्ठ व सिद्धार्थ वज्राचार्य लिसें जुजुकाजी रंजित, निशा देसार, सज्जु मानन्धरं सांगीतिक ज्याझ्वः न्ह्यब्वयादीगु खःसा संगीतकार श्रेष्ठ, सविना मानन्धर, सुरेश मानन्धर, राजेन्द्र डंगोल लगायतं जनगायक श्रेष्ठया सम्मानय् विशेष सांगीतिक ज्याझ्वः न्ह्यब्वयादीगु खः ।

येँ महानगरपालिका १३ वडाया नांजाःम्ह स्थानीय समाजसेवी दिलबहादुर मानन्धर जहान गणेशदेवी मानन्धरया लुमन्तिइ वय्कःया छेँजःपिंसं प्रतिष्ठान नीस्वंगु खःसा मदुम्ह गणेशदेवीया निदँया तिथि लाकाः हनेज्या याःगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु