न्हूदँबलय् मजूगु र्‍याली शंखधर दिवसकुन्हु जुइगु

नेपाल संवत न्हूदँ राष्ट्रिय समारोह समिति ११३९या व्यवस्थापन व उपसमितिया दुजः मुँज्यां थ्वहे वइगु कछलाथ्व दसमि (मंसीर २ गते) आइतवाः शंखधर दिवस तःजिक हनीगु जूगु दु । लिसें नेपाल संवत आन्दोलनया प्रणेता नेवाः न्ह्यलुवाः मदुम्ह पद्मरत्न तुलाधरया विचाः हायेका ज्याझ्वः यायेगु व न्हूदँया लसताय् सफू ब्वज्यालिसें सांस्कृतिक ज्याझ्वः यायेगु निर्णय नं याःगु दु ।

तत्कालीन प्रधानमन्त्री कृष्णप्रसाद भट्टराईया नेतृत्वया सरकारं नेपाल संवतया प्रवर्तक शंखधर साख्वाःयात राष्ट्रिय विभूति घोषणा याःगु दिंयात कयाः दँय् दसं कछलाथ्व दसमिया न्हियात शंखधर दिवस कथं हनाः वयाच्वंगु खः । समारोह समितिं शंखधर दिवस थुगु दँय् तःजिक न्यायेकेगु नितिं येँया बसन्तपुरय् दसमिया न्हि (मंसीर २ गते) सुथसिया ७ ता इलय् सकलसित मुनेत नं इनाप याःगु दु ।

सांस्कृतिक र्‍याली लिसें जुइगु शंखधर दिवस तःजिक हनेगु नितिं समितिं थीथी कवःयात थौं आइतवाःया मुँज्यां भाला ब्यूगु दु । समारोह समितिं ब्यूगु जानकारी कथं बसन्तपुरय् मुनाः शंखधर दिवसया र्‍याली बसन्तपुरं प्याफः, न्यत, त्यंगः, थाय्मदु, असं, बालकुमारी, जनबहाः, वंघः जुयाः मरु, चिकंमू, जैशीदेगः, लगं, ब्रम्हत्वाः, वन्दे, ह्यूमत, क्वहिति, क्वहितिं भिंद्यःत्वाः जुयाः परोपकारं चागः लखुतीर्थय् थ्यनेवं शखंधरया किपातय् स्वांमाः क्वखायेकाः सभा यायेगु ज्याझ्वः तयातःगु दु ।

अथेहे समारोह समितिया मुँज्यां नेवाः न्ह्यलुवाः लिसें नेपाल संवत आन्दोलनया प्रणेता, बहुआयामिक व्यक्ति मदुम्ह पद्मरत्न तुलाधरया १३ न्हुया पुण्यतिथिइ कार्तिक ३० गते सुथय् बसन्तपुरय् बिचाः हायेकेगु नितिं थीथी खलः पुचः, संघसंस्थानाप जानाः मंकाः विचाः हायेका ज्याझ्वः यायेगु सहलह ब्याकूगु दु ।

थुकिया नितिं सोमवाः थीथी संघसंस्था, खलःपुचःपिनिगु प्रतिनिधिपिं दुथ्याइगु मुँज्या च्वनीगु जूगु दु । अथेहे, न्हूदँया लसताय् पिदंगु सफू, क्यालेन्डर, म्येचाःलिसें नेपालभाषाया थीथी सफू ब्वज्या, नसात्वसा स्टललिसें सांस्कृतिक ज्याझ्वः याइगु जूगु दु । उगु ज्याझ्वः थ्वहे वइगु मंसीर ८ गते शनिवाः येँया थँहितिइ न्हिच्छियंकं याइगु जूगु दु ।

थ्व ज्याझ्वःया नितिं छुं दिं लिपा हे सार्वजनिक सुचं पितबिसें ज्याझ्वःया व्यवस्थापन यायेगु खँया जानकारी समारोह समितिं ब्यूगु दु । वंगु कार्तिक १८ गते भाजु तुलाधर मदुगुलिं समारोह समितिं न्हूदँया लसताय् ने.सं. ११३९ कछलाथ्व पारुकुन्हुया भिंतुना र्‍याली व भिंतुना सभा स्थगित याःगु खःसा १३ न्हुतक लसता ज्याझ्वः मयायेगु निर्णय याःगु खः ।