अनगारिका डा. अनोजा गुरुमां मंत, सीम्ह धुलिखेल अस्पतालयात दान याइगु

येँ – नांजाःम्ह अनगारिका श्रद्धेय डा. अनोजा गुरुमां मंत । वंगु चान्हसिया १ः२२ बजे मेडिसिटी अस्पतालय् वासः याकुयाकुं वसपोल मदुगु खः । ६३ दँ दुम्ह वसपोल चोभारया सुलक्षणकीर्ति विहारया प्रमुख खः ।

ताःई न्ह्यवंनिसें प्वाःया क्यान्सर ल्वचं मफयाच्वंम्ह वसपोलयात मेडिसिटी अस्पतालय् भर्ना यानातःगु खःसा अन हे वासः याकुयाकुं वसपोल मदुगु खः ।
भ्वँतय् जन्म जुयाबिज्याःम्ह वसपोलया गृहस्थी नां शारदा मानन्धर खः । झिंछदँ दुबलय् हे छेँ त्याग यानाः भारतया बनारसय् वसपोल प्रव्रजित जुयाबिज्याःगु खः ।अनं लिहां वयाः वसपोल त्रिशुलीया सुगतपुर विहारय् च्वनाबिज्याःगु खःसा वयां लिपा किम्डोल विहारय् संघर्षपूर्ण ढंगं च्वनाबिज्याःगु खः । वयां लिपा श्रद्धेय धम्मवती गुरुमांया संरक्षकत्वय् वसपोल धर्मकीर्ति विहारय् च्वनाबिज्यात । लिपा चोभारय् सुलक्षणकीर्ति विहार निर्माण लिपा वसपोल अन हे च्वनाबिज्याःगु खः ।

मदुम्ह गुरुमांया सीम्हयात अन्त्येष्टि मयासे वसपोलया हे इच्छा कथं धुलिखेल मेडिकल कलेजयात चिकित्सकीय अनुसन्धान ज्याया लागि दान याइगु जूगु दु ।
वसपोलया सीम्हयात अन्तिम श्रद्धाञ्जलीया लागि जेठ ५ गते शुक्रवाः न्हिनय् १२ बजे तक सुलक्षणकीर्ति विहारय् तइगु व वयां लिपा अस्पतालयात दान बीगु खँ धाःगु दु ।
अनोजा गुरुमानं म्यान्मारया खेमाराम विहारपाखें अभिधर्म अध्ययन यानाबिज्याःगु खःसा वि.सं. २०५४ सालय् भारतया सम्पूर्णानन्द विश्वविद्यालयपाखें ‘अभिधम्मवतर्पुरन्तिक’ बिषयय् विद्यावारिधी यानाबिज्याःगु खः ।

सुलक्षणकीर्ति विहारय् स्वनिगः बाहेक नेपाःया थीथी दुर्गम जिल्लां वइपिं मिसा मस्त नं ऋषिणी कथं च्वनाः बुद्ध धर्म अध्ययन यानाच्वंगु दु । वसपोल धर्मोदय सभा, बौद्ध परियत्ति शिक्षा केन्द्र, ध्यानकुटी विहार, धर्मकीर्ति विहार आदिइ नं आवद्ध जुयादी । वसपोलया बुद्ध धर्मलिसे सम्बन्धित छगू दर्जन सफू पिहां वयाच्वंगु दु ।

लिपांगु इलय् वसपोल चोभारया सुलक्षणकीर्ति विहार नापसं हे छगू उच्चस्तरीय सेवा बीगु सामुदायिक अस्पताल चायेकेगु तयारी याना च्वनाबिज्याःगु खः ।