थःत पक्राउ पूर्जी वयेवं विप्लवया आन्दोलन घोषणा
येँ (नेपालभाषा टाइम्स)÷थः विरुद्ध पक्राउ पूर्जी जारी जुइवं नेत्र विक्रम चन्द ‘विप्लव’ नेतृत्वया नेपाल कम्युनिष्ट पार्टीं संघर्षया ज्याझ्वः घोषणा याःगु दु । येँ जिल्ला अदालतं म्हीग गोरखापत्रय् सार्वजनिक सुचं हे पिकासें विप्लवयात ३५ न्हु दुने हाजिर जू वा धकाः आदेश बिउगु खः ।
जिल्ला अदालतया थज्याःगु आदेश वयेवं विप्लवया पार्टीं म्हिगः हे विज्ञप्ति जारी यासें महासचिव विप्लव विरुद्ध पक्राउ पुर्जी जारी यायेगु ज्या गैरकानुनी, अराजक व विध्वंसात्मक खः धाःगु दु । उकिया विरुद्ध म्हिगः हे मसाल जुलुस पिकाःगु खःसा थौं न्यायाधीशया पुत्ला च्याकेगु व कन्हय् २ बजे देय्न्यंकं प्रदर्शन यायेगु कार्यक्रम नं विज्ञप्तिइ न्ह्यथनातःगु दु ।
येँ जिल्ला अदालतं २०७६ साल पुसया मुद्दाया आधारय् मंसिर १८ गते महासचिव विप्लव लगायत उगु पार्टीया नेतात खड्गबहादुर विश्वकर्मा व गायक माइला लामाया विरुद्ध पक्राउ पुर्जी जारी याःगु खः । विप्लवया पार्टीं धाःसा अदालतया थ्व निर्देशनयात २०७७ साल फागुन २१ गते सरकारलिसे जूगु ३ बुँदे सहमतिया तप्यंक उल्लंघन जक मखु देय्या समस्यायात शान्तिपूर्ण रुपं निकास बीत जुयाच्वंगु गम्भीर पहल स्यंकेत जूगु विध्वंसात्मक हमला खः धकाः आलोचना याःगु दु ।
थःगु पार्टीयात तयातःगु प्रतिबन्ध चीकेगु नितिं राज्यलिसे याःगु ३ बुँदे सहमतिइ पार्टीया नेता कार्यकर्तायात तयातःगु मुद्दा लित कायेगु व बन्दीतय्त मुक्त यायेगु खँ उल्लेख जुयाच्वंगु खँ न्ह्यथँसें विज्ञप्तिइ धयातःगु दु, ‘राज्यया सहमतियात कानुनया अंग दयेकाः समस्या समाधान यायेत ग्वाहालि यायेमाःगु मू अंग अदालतं हे गैरकानुनी पलाः छीगु धइगु देशय् शान्ति प्रक्रिया स्यंकेत अदालत व न्यायाधीश हे सक्रिय जूगु जकं मखु ला धकाः आशंका ब्वलंगु दु ।’
विप्लवयात ज्वनेगु धकाः जिल्ला अदालतं पूर्जी जारी याःगुलिं थुकियात प्रधानमन्त्री लिसें माओवादी केन्द्रया अध्यक्ष पुष्पकमल दाहालं नं ‘गलत ज्या जुल’ धकाः टिप्पणी यानादीगु दु ।
जनयुद्धया झ्वलय् जूगु ज्याखँयात कयाः बिस्कं अदालतं फैसला याइ धकाः शान्ति सम्झौता जूगु खःसां आः वयाः प्रचलित कानुन कथं हे फैसला याना हःगुलिं थुकिं यानाः पूर्व माओवादी नेतात थारान्हूगु दु । यदि विप्लवयात ज्वन धाःसा कन्हय् थ्वहे नजिरया लिधंसाय् माओवादी नेतात दाहाल लगायत बाबुराम भट्टराई, हिसिला यमि आदिपिंत नं अदालतय् साले फइगु अनुमान याना हःगु दु ।
LEAVE YOUR COMMENTS