त्यंगःत्वाः खलःया दँमुँज्या

येँ (नेपालभाषा टाइम्स)- त्यंगः त्वाः खलःया दँमुँज्या वंगु शनिवाः छगू ज्याझ्वःया दथुइ क्वचाल । मूपाहां येँ महानगरपालिकाया निवर्तमान प्रमखु विद्यासुन्दर शाक्यं त्वाःदेवाय् मत च्याका उलेज्या यानादीगु ज्याझ्वलय् विशेष पाहां येँमपाया प्रवक्ता नापं १७ वडा अध्यक्ष नविन मानन्धर व पाहांकथं येँमपा १८ वडा अध्यक्ष न्हुछेकाजी महर्जन व वडा सदस्य हेराशोभा महर्जन झायादीगु खः ।

खलःया नायः धनबहादुर महर्जन ‘तिमिला’ सभापतित्वय् न्ह्याःगु ज्याझ्वलय् मूपाहां विद्यासुन्दर शाक्य, विशेष पाहां नविन मानन्धर, पाहां न्हूछेकाजी महर्जन, त्वाःया थाकुलि न्वकु देवनारायण महर्जन, स्वकुलिनापं कजि कृष्णनारायण महर्जन, प्यकुलि पंच महर्जन, न्याकुलि तीर्थरत्न महर्जन, धिमे गुरु धर्म महर्जन, निवर्तमान नायः कुलबहादुर महर्जन, मिसा पुचःया नायः नानीहिरा महर्जन, ल्याय्म्ह पुचःया नायः बालकृष्ण महर्जन व हामू हरिनारायण महर्जनपिंसं थःथःगु नुगःखँ तयादीगु खः ।