चीन लिपा भारतया रेल प्रस्ताव

येँ (नेपालभाषा टाइम्स)- छुं ई न्ह्यः तिनि उत्तरी जःलाखःला चीनलिसे रेलमार्ग बारे खँल्हाबल्हा याःम्ह वर्तमान सरकारयात भारतं नं रेलया हे प्रस्ताव न्ह्यःने हःगु दु । नेपाः भ्रमणय् वःम्ह भारतीय विदेश सचिव विनयमोहन क्वात्रां म्हिगः उपप्रधान लिसें भौतिक पूर्वाधार यातायात मन्त्री नारायणकाजी श्रेष्ठलिसे यानादीगु खँल्हाबल्हाया झ्वलय् नेपाः–भारत रेलवेया बारे हे चर्चा जूगु खः ।

वय्कःपिनि दथुइ येँनिसें भारतया रक्सौल तक रेलवे सेवा विस्तार यायेगु बारे प्रारम्भिक सहलह जूगु खः । चीनलिसे नेपालं नेपाः–चीन स्वाइगु रेलवे बारे ज्या यानाच्वंगु दु ।

खँल्हाबल्हाया झ्वलय् उपप्रम श्रेष्ठं रेलवे सेवा, आर्थिक समृद्धि, नेपाः–भारत दथुइ जूगृु सन्धी सम्झौता व भारतीय पक्षं लगानी याःगु आयोजनाया बारे नं खँ तयादीगु खः ।

लिसलय् भारतीय विदेश सचिव क्वात्रां भारतीय कम्पनीं सञ्चालन यानाच्वंगु जयनगर–कुर्था रेल सञ्चालनया म्याद नवीकरणया विषयय् खँ तयादीगु खः । जगनगर–कुर्था रेल सञ्चालन भारतीय कम्पनी ‘केआरसिएलं’ याना वयाच्वंगु खःसा उकिया म्याद फुइत्यंगुलिं विदेश सचिव क्वात्रां नवीकरणया विषय ल्ह्वनादीगु खः ।

रेलवे सञ्चालनया निंतिं नेपाःया प्राविधिक जनशक्तियात तालिम बियाः दक्ष दयेकाः उमित हे अपरेशनया ज्याय् छ्यलेमाःगु सुझाव विदेश सचिव क्वात्रां बिउगु खःसा लिसलय् उपप्रम श्रेष्ठं नेपाःया प्राविधिक जनशक्तियात हे रेलवे सञ्चालनया नितिं दक्ष दयेकेगु खँ सकारात्मक व महत्वपूर्ण जूगु खँ धयादीगु खः । विदेश सचिव क्वात्रां अरुण तेस्रो आयोजनाया पहुँच मार्ग याकनं दयेकेत नं इनाप यानादीगु खः ।