चलखेल अप्वःगुलिं जग्गाया कित्ताकाट खुले याइन

येँ – देय्न्यंकं जग्गाया कित्ताकाट ज्या सरकारं पना बीवं मालपोत कार्यालयया कर्मचारीतय्सं व्यापक चलखेल यानाच्वंगु खँ सीदयेवं सरकारं कित्ताकाट खुल्ला यायेगु तयारी शुरु याःगु खँ सीदुगु दु । थ्वहे वइगु स्वन्ति न्ह्यः हे कित्ताकाट खुल्ला जुइ फइगु खँ सम्बन्धित सूत्रं धाःगु दु ।

सरकारं बुँज्या यायेत जग्गा बचे यायेगु धकाः देय्न्यंकंया जग्गाया कित्ताकाट यायेगु ज्या बन्द याःसां नं मालपोत कार्यालयया कर्मचारींनिसें मन्त्रालयया हाकिमया समेत संलग्नताय् कित्ताकाट यायेगु ज्या धाःसा जुयाच्वंगु खः । उकिं सरकारं आः कित्ताकाट सम्बन्धी कार्यविधि हे दयेकाः स्वन्ति न्ह्यः खुल्ला यायेगु तयारी याःगु खः ।

उकिया नितिं भूमि व्यवस्था तथा गरिबी निवारण मन्त्री पद्मकुमारी अर्यालं अध्ययन यानाच्वंगु दु । मन्त्री अर्यालं कार्यविधियात कयाः थीथी विज्ञपिं लिसे सहलह यानाच्वंगु खँ नं सीदुगु दु । सहलह सिधयेवं थुगु कार्यविधियात मन्त्री परिषदं पारित यानाः लागू यायेगु कथं ज्या जुयाच्वंगु दु ।

कार्यविधि धाःसां नं थ्व नियमावली कथं हे तयार जुया वइगु खँ धाःगु दु । जग्गा कित्ताकाट यायेगु ज्या बन्द जुइवं सर्वसाधारण जनतायात थःगु जग्गा मी मखनाः मस्तय्त आखः ब्वंकेत व विरामी छेँजःयात वासः यायेत तकं समस्या जुयाच्वंगु खःसा अथे मर्कालय् लाःपिं मनूतय् जग्गा धाःसा दुनें दुनें कित्ताकाट यायेगु ज्या जुयाच्वंगु खः ।

तर उकथं कित्ताकाट यायेगु झ्वलय् स्वंगू लाख निसें प्यंगू लाख तका घुस नकेमाःगु खः । कित्ताकाट यायेगु ज्या दिकेवं जग्गा व्यापारी स्वयां सर्वसाधारण जनता अप्वः पीडित जुइमाःगुलिं नं याकनं हे कित्ताकाट खुल्ला यायेगु तयारी मन्त्री अर्यालं यानादीगु खँ सीदुगु दु ।

थ्व स्वयां न्ह्यःया भूमिसुधार मन्त्री चक्रपाणि खनालं नं कित्ताकाट बन्द जुयाः सर्वसाधारण जनता अप्वः प्रभावित जूगु धासें कित्ताकाट खुल्ला यायेगु तयारी याःगु खः । तर मन्त्रालय कुचा दलेवं मन्त्री खनालया ज्या थाति लाःगु खः । सरकारं २०७४ साउन २६ गतेनिसें बुँज्या यायेत योग्य जग्गाया कित्ताकाट पनाबिउगु खः ।

सम्बन्धित बुखँ

LEAVE YOUR COMMENTS