सहुलियत त्यासा काःवयेत बैंकतय् आह्वान
येँ – राष्ट्र बैंकया निर्देशन कथं बीमाःगु सहुलियत त्यासा बीत आनाकानी यानाच्वंगु बैकतय्सं आः धाःसा सहुलियत त्यासा काःवयेत आह्वान हे याःगु दु । म्हिगः बैंकर्स संघ, डेभलपमेन्ट बैकर्स एसोसिएसन व नेपाल वित्तिय संस्थापाखें विज्ञापन हे पितबिसें सहुलियत त्यासा काः वयेत आह्वान याःगु खः ।
सरकारं हःगु सहुलियत त्यासाया निंतिं ब्याज अनुदान सम्बन्धी एकीकृत कार्यविधि कथं क, ख व ग वर्गया बैंक व वित्तिय संस्थाया मंकाः संगठनतय्सं त्यासा काःवयेत इनाप याःगु खः । सहुलियत त्यासा सम्बन्धी कार्यविधियात मन्त्रिपरिषदया बैठकं भदौ २१ गते स्वीकृत याःगु खःसा अर्थमन्त्रालयं असोज ६ गते सार्वजनिक याःगु खः ।
नेपाल राष्ट्र बैंकं परिपत्र जारी यानाः सहुलियत त्यासा कायेत बैंक व वित्तिय संस्थाय् वनेत सर्वसाधारणयात इनाप याःगु खः । यदि प्रक्रिया पूवंकाः नं त्यासा मबिल धाःसा केन्द्रिय बैंकय् उजुरी तयेत नं केन्द्रीय बैंकं धाःगु खः ।
सरकारं क्वःछिनातःगु सहुलित त्यासा कथं शैक्षिक प्रमाणपत्र बरः तयाः शिक्षित युवातय्सं स्वरोजगार त्यासा, व्यवसायिक कृषि व पशुपंक्षी त्यासा, विदेशं लिहां वंपिंसं युवा परियोजना त्यासा, महिला उद्यमशील त्यासा, दलित समुदाय व्यवसाय विकास त्यासा, उच्च प्रविधि व प्राविधिक लिसें व्यावसायिक शिक्षा त्यासा व भुखाचं पीडितया निंतिं सहुलियत आवास दयेकेगु त्यासा सहुलियत ब्याजदरं काः वयेगु निंतिं बैंकतय्सं आह्वान याःगु खः ।
LEAVE YOUR COMMENTS