कारखानाय् मिं नयाः प्यखा छेँ झौ

ख्वप(नेपालभाषा टाइम्स) - थनया चुनदेवी च्वंगु छगू फर्निचर कारखानाय् मिं नयाः प्यखा छेँय् बांमलाक क्षति जूगु दु । वंगु आइतवाःसूर्यविनायक नगरपालिका वडा नं. ५ चुनदेवीइ फर्निचर कारखानाय् मिं नयाः करोडौंया क्षति जूगु दु ।

चुनदेवीइ च्वंगु विजेन चौगुथिं संचालन यानाच्वंगु न्यू दाजुभाइ फर्निचर ट्रेडर्सं मिं नयेगु शुरु जूगु खः । मिं नयाः चौगुथिं थःगु हे छेँय् तयातःगु फर्निचर पसःलिसें स्वतँ जाःगु छेँ बांमलाक क्षति जूगु दु । उकिया नापं च्वंगु पुष्प शिल्पकारं संचालन यानाच्वंगु कृपालु फर्निचरया कारखाना नं क्षति जूगु दु ।

जस्तां खुयातःगु फर्निचर कारखानाय् मिं नयेवं जस्ताया बार चाये मफुगुलिं मि मेथाय् नं न्यना वंगु खः । आइतवाः बहनिसिया इलय् जूगु घटनाय् मानवीय क्षति मजूसां अन्न, फर्निचर, फर्निचर दयेकेत हयातःगु थीथी कच्चा पदार्थ, केमिकल, सवारी साधन, नगद, जिन्सी लिसें मेमेगु आपालं सामग्री नष्ट जूगु दु । प्रहरीया कथं मिं नयाः करिब निगूत्या करोड बराबरया क्षति जूगु दु ।

येँ, यल, ख्वपलिसें नेपाल प्रहरी, नेपाली सेना व सशस्त्रया दमकल व स्थानीयया ग्वाहालिं लगातार प्यघौतकया कुतः लिपा मि नियन्त्रणय् काःगु खः । ग्यास लिक जुयाः फर्निचर कारखानाय् मिं नःगु खःसा लिपा कारखानाय् तयातःगु प्यंगः ग्यास सिलिन्डर विस्फोट जुइवं मिं उग्र रुप काःगु खः ।