लकडाउन अवस्थाय् मखनय् हिदान

येँ – महादेव मखन क्लबया ग्वसालय् बिहिवाः आकस्मिक हिदान ज्याझ्वः जुल । हनुमानध्वाखा स्थिति महाद्यःया देगः न्ह्यःने जूगु थुगु हिदान ज्याझ्वलय् २८ म्हेसिनं हिदान याःगु खः ।

कोरोना भाइरस संक्रमण जुइफुगु खतरायात ध्यानय् तयाः सरकारं लकडाउन जारी यायेधुंकाः स्वनिगलय् हिया अभाव खनेदयाच्वंगु दु । थ्व हे अभाव पूर्ति यायेगु निंतिं ब्लड डोनर्स एशोसियसनपाखें डोर टु डोर हिदान ज्याझ्वः न्ह्याका वयाच्वंगु दु ।

थ्व हे झ्वलय् मखनय् २८ औं डोर टु डोर हिदान ज्याझ्वः जूगु खँ एशोसियसन काठमाडौं जिल्लाया सचिव व डोर टु डोरया संयोजक अनिल रत्न तुलाधरं कनादिल । डोर टु डोर पाखें आःतकया दुने १४ सय पिन्ट हि मुंकेधुनागु खँ नं वय्कलं कनादिल ।

मखनय् जूगु ज्याझ्वलय् ब्लोडानया अध्यक्ष सानुबाबु प्रजापति, कोषाध्यक्ष मचाकाजी महर्जन, महादेव मखन क्लबया नायः व २४ वडा सदस्य विनोद तुलाधर, सचिव इन्द्रमणी कपाली, कोषाध्यक्ष सम्झना जोशी, सहसचिव अनुप श्रेष्ठ लिसें क्लबया दुजःपिंसं हिदानया निंतिं सहजीकरण यानादीगु खः । ज्याझ्वलय् स्थानीय त्वाःबासीपिं लिसें प्रहरी, समाजसेवी, पत्रकारपिंसं नं हिदान याःगु खँ क्लबया नायः तुलाधरं कनादिल ।