फल्चा पुनःनिर्माणया निंतिं वडास्तरय् भेला

ख्वप – थनया वडा नं. ९ स्थित तःलांतुंथिइ च्वंगु पुलांगु फल्चायात थुनाः न्हूगु दयेकीगु जूगु दु । फल्चा पुनःनिर्माणया निंतिं वडास्तरय् छगू भेला नं जूगु खः । वडा नं. ९ या वडाअध्यक्ष रविन्द्र ज्याख्वःया कुतलय जूगु भेलाय् उपस्थित जुयादीपिं स्थानीयवासीतय्सं थःथःगु विचाःप्वंकादीगु खः । भेलां फल्चा पुनःनिर्माणया निंतिं छगू उपभोक्ता समिति नं गठन याःगु दु । आशकुमार प्रजापतिया अध्यक्षताय् न्हय्म्हेसिया उपभोक्ता समिति गठन याःगु खः । आपालं वडावासीतय्सं ब्वति काःगु भेलाय् वडाअध्यक्ष ज्याख्वः, ओभरसियर अर्हत वज्राचार्य, वडासचिव पुण्यराम लाखा लिसें वडाया गन्यमान्यपिंसं नुगःखँ तयादीगु खः ।