नपायात मनपाया छगू छगू करोड

येँ – राजधानी येँ देय्या फुक्क हे नगरपालिकातय्त समृद्ध दयेकेगु ताः तयाः येँ महानगरपालिकां येँया झिगू नगरपालिकातय्त म्हतिं १÷१ करोड दां लःल्हाःगु दु । थनया राष्ट्रिय सभागृहय् म्हिगः ग्वसाः ग्वःगु छगू ज्याझ्वलय् येँ मनपाया मेयर विद्यासुन्दर शाक्य व उपमेयर हरिप्रभा खड्गी श्रेष्ठं येँ देसय् थुगुसी तिनि घोषणा जूगु गुंगू न्हूगु नगरपालिकाया मेयरपिंत छगू छगू करोड तकाया चेक लःल्हानादीगु खः ।

छगू करोड तका प्राप्त याःपिं नगरपालिकातय्सं थ्व दांपाखें थःथःगु नगरपालिकाय् हरियाली पार्क दयेकेगु ज्याय् छ्यलेगु सम्झौतापत्रय् नं म्हिगः हे हस्ताक्षर जूगु खः ।ज्याझ्वलय् नुगःखँ प्वंकुसें मेयर विद्यासुन्दर शाक्यं येँ देय्या फुक्कं नगरपालिकात बांलात धाःसा उकिं आन्तरिक पर्यटक अप्वइगु व सरकारं सन् २०२० य् यायेत्यंगु भिजिट नेपाल दँयात नं तिबः बीगु विश्वास प्वंकादिल ।

येँ क्षेत्र नं. ९ या सांसद कृष्णगोपाल श्रेष्ठं येँ मनपां बिउगु थ्व दांयात हरेक नगरपालिकां सदुपयोग याइगु विश्वास प्वंकादिल । ज्याझ्वलय् संखरापुर नपा (सक्व)या मेयर सुवर्ण श्रेष्ठ, तारकेश्वरया रामेश्वर बोहरा, बुढानिलकण्ठया उद्धव खरेल, किपूया रमेश महर्जन, गोकर्णेश्वरया सन्तोष चालिसे, नागार्जुनया मोहन बस्नेत, चन्द्रागिरिया घनश्याम गिरी, दक्षिकाली मोहन बस्नेत व कागेश्वरी–मनहरा नपायात चेक लःल्हानादीगु खः । टोखा नगरपालिकायात न्हापा हे छगू करोड बीधुंकूगु दु ।

सम्बन्धित बुखँ

LEAVE YOUR COMMENTS