ससफो–नयाँ शक्ति एकीकरण सम्भावना मदु

येँ – संघीय समाजवादी फोरम व नयाँ शक्ति पार्टी दथुइ एकीकरणया सम्भावना म्हो जक खनेदःवंगु दुु । छुं न्हिं न्ह्यवनिसें निगू पार्टी दथुइ एकीकरण जुइ धकाः समाचार पिहां वयाच्वंगु खःसां नं तत्काल पार्टी एकीकरणया सम्भावना मदुगु खँ ससफोया सहअध्यक्ष राजेन्द्र श्रेष्ठं ‘नेपालभाषा टाइम्स’यात कनादीगु दु । वय्कःया कथं नयाँ शक्तिया न्यागू ‘स’ यात थःपिंसं स्वीकार यानागु खःसां नं नयाँ शक्तिं संघवादयात स्वीकार मयाःगुलिं यानाः पार्टी एकीकरण जुइ स्थिति मदु ।

वय्कलं बियादीगु जानकारी कथं निगू पार्टीया दथुइ इलय् ब्यलय् पार्टी एकीकरणयात कयाः वार्ता जुयाच्वंसां नं उकी प्रगति धाःसा जुइ फयाच्वंगु मदु ।समाजवादयात निगुलिं पार्टीं स्वीकार याःसां नं संघवादयात नयाँ शक्तिं वाद मखु धासें अस्वीकार याना वयाच्वंगु खः । संसारय् प्यसः दँ न्ह्यवंनिसें स्वीकार याना वयाच्वंगु संघवादयात नयाँ शक्तिं वाद हे मखु धकाः याना वयाच्वंगु वय्कःया धापु दु ।पार्टी एकीकरणया पंगः जुयाच्वंगु मेगु विषय धइगु संगठनया नेतृत्वया कारणं नं जूगु खँ वय्कलं धयादीगु दु ।