दँय् छगू सांस्कृतिक बाजनय् धेंधेंबल्लाः कासा

ख्वप – ख्वप नगरपालिकापाखें दँय् छगू थीथीकथंया नेवाः सांस्कृतिक बाजंया धेंधेंबल्लाः कासा याना वनेगु ग्वसाः कथं वंगु शनिवाः धाः बाजं कासा जुल । थनया दत्तात्रय चोकय् जूगु कासाया उलेज्या ख्वप नगरपालिकाया प्रमुख सुनील प्रजापति व उपप्रमुख रजनी जोशीं मंकाःकथं यानादीगु खः ।

‘पुर्खां दयेकातःगु सम्पत्ति, झीगु कला व संस्कृति’ धइगु नारा बियाः ख्वप नगरपालिकां न्ह्याकूगु थुकथंया सांस्कृतिक बाजं धेंधेंबल्लाः कासाया झ्वलय् जूगु धाःबाजं कासा तेखापुखू त्वालं न्ह्याःगु खः । मुक्कं स्वीन्हय्गू पुचलं ब्वति काःगु कासा दत्तात्रय चोकय् थ्यंकाः क्वचायेकूगु खः ।

कासाय् न्हाप, लिउ व लियांलिउ लाःगु बाजं खलःयात नेपाल मजदुर किसान पार्टी (नेमकिपा)या अध्यक्ष नारायणमान बिजुक्छेँ रोहितं सिरपाः व दसिपौलिसें धाःबाजं छज्वः नं लःल्हानादीगु खः ।उगु कासाय् नासः हय्माः धाःबाजं न्हापा, नित्यनाथ बाजं खलः लिउ व एभरेष्ट इंग्लिश स्कुल धाःबाजं खलः लियांलिउ लाःगु खःसा आकाश भैरव नौबाजं धाःबाजं खलःयात हःपाः सिरपाः बिउगु खः ।

ज्याझ्वलय् नेमकिपाया नायः बिजुक्छेँ, सांसद प्रेम सुवाल, प्रदेशसभा सदस्य सुरेन्द्रराज गोसाइ, उपप्रमुख जोशी, निर्णायकमण्डलया विष्णुबहादुर मानन्धरं थःथःगु नुगःखँ तयादीगु खः । तेखापुखूनिसें दत्तात्रयतक स्थलगत रुपं हे न्ह्याःगु कासाया निर्णायकमण्डलय् मानन्धरलिसें इन्दिरा लाछिमस्यू च्वनादीगु खः ।

कासाया उलेज्या लिपा जूगु छगू सांस्कृतिक ¥यालीइ ख्वप नपाया प्रमुख, उपप्रमुख, वडाअध्यक्ष व वडा सदस्यपिं सहभागि जुयादीगु खःसा ब्वति काःगु दक्वं पुचःयात धाः छज्वःलिसें भुस्याः, ताः नं लःल्हाःगु खः ।

सम्बन्धित बुखँ

LEAVE YOUR COMMENTS