प्रमया सल्लाहकारतपाखें मंकाः राजीनामा

येँ – आः वइगु छन्हु निन्हुया दुने हे मन्त्रिमण्डल पुनर्गठन जुइगु सम्भावना दुगु खँ सीदुगु दु । आः दुपिं गुलिखे मन्त्रीतय्सं बांलाक ज्या मयाःगु धासें थ्व मन्त्रिमण्डल पुनर्गठन यायेगु तयारी जूगु खँ सीदुगु दु । थ्व स्वयां न्ह्यः नं मन्त्रिमण्डल पुनर्गठन जुइगु खँ धाःसां नं थीथी हुनिं यानाः याये मफयाच्वंगु खःसां नं थ्व छवाःया दुने धाःसा पुनर्गठन याना हे छ्वइगु खँ सूत्रं धाःगु दु ।

थ्वहे झ्वलय् आः गठन जुइगु मन्त्रिमण्डलयात अःपुकेगु नितिं प्रधानमन्त्रीया सचिवालयनाप स्वापू दुगु थीथी पदाधिकारीतय्सं म्हिगः राजीनामा बिउगु दु । न्हूगु मन्त्रिमण्डल गठन यायेगु ताः तयाः म्हीग शुक्रवाः सचिवालयय् दुपिं फुकसितं सःताः प्रधानमन्त्री ओलीं राजीनामा बीत निर्देशन बियादीगु खःसा म्हिगः राजीनामा वःगु खः ।

प्रधानमन्त्रीया निर्देशन कथं प्रधानमन्त्रीया मुख्य सल्लाहकार बिष्णु रिमाल, परराष्ट्र सल्लाहकार डा. राजन भट्टराई, जनसम्पर्क सल्लाहकार अच्यूत मैनाली, प्रेस सल्लाहकार डा. कुन्दन अर्याल, प्रमुख स्वकीय सचिव इन्द्र भण्डारी व सूचना प्रविधि सल्लाहकार अस्गर अलीपिंसं राजीनामा बियादीगु खः ।

वय्कःपिनि थ्व राजीनामायात अजूचायापुगु घटनाया रुपय् राजनीतिक ख्यलं काःगु दु । वय्कःपिं सकलें प्रधानमन्त्री थम्हं हे नियुक्त यानातःपिं खः । वय्कःपिंसं प्रधानमन्त्रीयात सही सल्लाह मबिल धकाः नं पिने आलोचना जुया वयाच्वंगु दु ।

थ्वहे झ्वलय् प्रधानमन्त्री ओलीं मेपिं छुं मन्त्री व राजदूतपिंत नं राजीनामा याकेगु तयारी यानाच्वंगु खँ सूत्रं धाःगु दु । यदि उमिसं राजीनामा मयात धाःसा बर्खास्त याये फइगु खँ धाःगु दु । प्रधानमन्त्री ओली छुं मन्त्रीतय् ज्यायात कयाः असन्तुष्ट जुया वयाच्वंगु खः ।