ने. सं. ११४४ कौलाथ्व पारू - नःलास्वनेगु

११ प्रदेश दुगु संघीयता माग

समाजवादी पार्टीपाखें संविधान संशोधनया आह्वान

येँ – न्हू नीस्वंगु समाजवादी पार्टी नेपालं आः नेपालय् झिंछगू प्रदेश दयेकेमाःगु माग याःगु दु । संविधान संशोधन यानाः झिगू भौगोलिक व छगू गैरभौगोलिक प्रदेश दयेकेमाःगु माग याःगु खः । म्हिगः प्रज्ञा प्रतिष्ठानय् संघीय समाजवादी फोरम व नयाँ शक्ति पार्टी एकीकरण ज्याझ्वलय् न्ववायेगु झ्वलय् पार्टीया नेता डा. बाबुराम भट्टराईं उगु खँ धयादीगु खः ।

वय्कलं राज्य पुनर्संरचना आयोगया प्रतिवेदन कथं प्रदेश दयेकेमाःगु माग यानादीगु खः । अध्यक्ष भट्टराईं इलय् हे संविधान संशोधन मजुल धाःसा गुगुं नं इलय् सरकार त्वःताः आन्दोलनय् वनेगु ख्याच्वः नं बियादीगु दु । वय्कलं सतक थःपिनिगु न्हापांगु प्राथमिकता खः धासें सतक, सदन व सरकार स्वंगुलिं थासं आन्दोलनया धाकुफय् हयेगु ख्याच्वः बियादिल ।

वय्कलं संविधान संशोधनया माग पूमवन धाःसा सरकारं पिहां वयेगु ख्याच्वः नं बियादिल । अथे हे केन्द्रीय कार्यसमितिया अध्यक्ष उपेन्द्र यादवं आः चिचीधंगु पार्टी चायेकाः च्वनेगु आवश्यकता मदु धासें फुक्कं पार्टीयात छगू हे पार्टीइ गोलबन्द जुइत इनाप यानादिल । वय्कलं नं संविधान संशोधन मजुल धाःसा सरकारय् च्वनाच्वनेगु औचित्य मदु धासें याकनं संविधान संशोधनया निंतिं अल्टिमेटम बियाः आन्दोलनय् कुहां वये मालेफु धयादिल ।

एकीकरण ज्याझ्वलय् डा. भट्टराई व यादवं फोरम व नयाँ शक्ति पार्टी विघटन यायेगु सहमतिइ हस्ताक्षर यानादीगु खः । ज्याझ्वलय् एकीकृत पार्टीइ अशोक राई वरिष्ठ नेता, राजेन्द्र श्रेष्ठ सहअध्यक्ष सहित २३ म्ह दुजः दुगु केन्द्रीय समिति नं सार्वजनिक याःगु दु ।

ज्याझ्वलय् भिंतुना बीगु झ्वलय् पुलांम्ह सभामुख लिसें नेपाली कांग्रेसया नेता दमननाथ ढुंगाना नं उपस्थित जुयादीगु खः । वय्कलं निगू पार्टीया एकतां राजनीतिइ न्हूगु आशा हःगु खँ कनादिल ।